張達倫捱13年終於做主角 「嚴謹」原來長期想放棄:真係等咗好耐

撰文:
最後更新日期:

近期TVB開始重用默默耕耘多年,而且有實力的演員。繼徐榮之後,入行13年的張達倫終於可以在新劇《好日子》裏擔任第二男主角。對於這個好消息,張達倫一聽到便開始嘴角帶笑:「真係等咗好耐!」

張達倫捱足13年,終於在新劇《好日子》上到位,當第二男主角。

他續道:「做演員都要有一個過程,呢個過程唔代表啲乜,可以學到好多嘢,但嚟到呢一刻,都唔代表啲咩嘅,都係希望觀眾鍾意我。」話雖如此,13年絕對不是短時間,在幾千天之間,張達倫笑言:「我長期都想放棄!由以前基本上冇乜機會,不停唔知自己點樣,返嚟做戲,好期待自己做咗主角就開心喇!」到開始有角色可以發揮如《愛·回家》的嚴謹,以及《不懂撒嬌的女人》Oscar,張達倫都有過瓶頸位:「做到咁上下又會迷惘,究竟可以再點樣做?」後來張達倫自我開解之後,嘗試揣摩其他角色之後,豁達地說:「在這山,望那山永遠唔會成功㗎。」因此他脫離了迷惘期。

《愛‧回家》張達倫和楊娜分別飾演嚴謹、霞姐,成功入位。

除了自我開解,張達倫坦言別人的鼓勵都很緊要。就算現在已經有太太,但張達倫仍難忘前女友黎芷珊的鼓勵與教誨:「以前入呢行,都以為自己靚仔,做演員實有好多機會,但係芷珊佢以前都入行有一段日子,佢好清楚呢一行要經歷啲乜嘢,所以佢以前成日鬧我:『有幾靚仔啫?靚仔咁又點啫?如果你冇實力,咁就冇意思。』所以佢會叫我好好裝備自己,做好自己就會有人欣賞。」張達倫將黎芷珊的話銘記於心,就算以前面對着兩人地位的落差,他都覺得沒有壓力,非常感謝前女友的支持和鼓勵。

張達倫已為人夫及父親,事業又上位,正值人生高峰。

張達倫現在的身份不同了,做了人夫及爸爸,更加需要搏殺:「而家做嘅每一件事都係為咗佢(囝囝)、為頭家。以前自己唔食,咁咪唔食囉,但而家自己唔食,個囝都一定要食,做嘢都係為咗佢。」以前有芷珊姐姐,現在就有老婆鼓勵:「佢同我講:『你得㗎!要畀心機呀!』佢做嘅每一件都係想畀我係無憂無慮,所以屋企有咩都係佢做晒!」講起老婆,張達倫笑得再Sweet一點,真係好閃。

 



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。