【收視分析師】TVB最好睇節目一定係除夕煙花騷 頒獎禮都要借過

撰文:
最後更新日期:

歡迎收睇逢星期三嘅《收視分析師》,嚟到2018年菁姐首先同各位讀者講返句新年快樂,由頭好到尾呀!多謝大家嘅支持,今個星期繼續同大家睇收視。上個星期2017年最後一個星期雖然多了幾日嘅聖誕紅假,但依然無咩點幫到煲劇嘅人數,《誇世代》同《溏心風暴3》分別錄得22點及21.1點。最令人驚喜嘅一定係除夕煙花直播騷《2018香港除夕倒數》都有19.9點,同劇集嘅成績不相伯仲。

估唔到TVB 2018年除夕倒數騷都有19.9點。

【收視分析師】拍續集真係咁好咩? 只係想食老本敷衍觀眾

【收視分析師】《溏心3》收視就快1字頭 不如轉睇KC送飯

亞視2013年試過除夕播返2011年嘅倒數,唔少網友被笑死。

雖然每年除夕節目最重要都係「10、9、8、7......2、1 happy new year」呢句,有人會覺得無咩特別,但唔知大家仲記唔記得亞視曾經係2015年除夕夜重播2011年的倒數節目,成功引起不少話題,當時呢件事係被網友率先發現,仲大讚亞視有創意,連煙花都可以重播。所以你話除夕對唔出街慶祝嘅香港人係好緊要。仲要而家網上平台多咗直播睇中台兩地嘅直播倒數騷,識睇一定睇內地除夕,因為上得台嘅嗰個都係港台最有人氣嘅歌手,又twins、林憶蓮、S.H.E.及蔡依林等等,吸引唔少網友坐定定睇住偶像唱歌㗎!

TVB連女團都玩埋,男團呢家嘢真係指日可待。

真係估唔多2018除夕歷時12分鐘嘅除夕煙花直播都有19.9點,即係有1,293,301人睇過,同係維港睇煙花嘅人數有得揮!雖然你都可以夾硬話,「車!19.9點都唔係好高!」同樣都係現場直播嘅《2017年度勁歌金曲頒獎典禮》就慘慘豬,得12.8點,呢個數字簡直係慘不忍睹,(唔好唔記得已經計埋apps翻睇),唔洗講有幾多人睇都知係低,一個180分鐘有咁多歌手嘅節目都敵不過12分鐘煙花騷,反映咗睇煙花好過聽佢地圍威喂唱歌。

ViuTV第一次播叱咤頒獎禮,以「不加插廣告,無間斷直播」作為賣點,擺明暗串TVB。

相反,元旦播嘅《叱咤頒獎禮》今年真係贏晒,雖然同TVB搞個個大家都係頒獎禮,不用分得那麼細。但今年轉播權就由ViuTV首次揸旗,今年仲要「不加插廣告,無間斷直播」作為賣點,擺明暗串TVB為播廣告 cut走曬得獎者講感受,我可以大膽估計係ViuTV最收得嘅節目。反而TVB前幾年都將《叱咤頒獎禮》擺到唔會有人睇嘅深夜時段播,邊會有人睇,第二日唔洗返工咩?!所以話,識睇TVB直播,一定係睇除夕倒數煙花騷!!



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。