【逆緣】陳家樂加入社署特別調查組 現實係負責幫社署查家宅?

撰文:
最後更新日期:

無綫劇集《逆緣》開始愈來愈有戲味,今晚嘅劇情就會講到「香港隊長」陳家樂獲政府安排到社會福利署工作,喺特別調查組裡面做文員,跟住高級特別調查主任林夏薇做嘢,加上有匿名人投訴姜大衛呃綜援,相信之後好快兩方面就有戲劇衝突。我諗大家都應該清楚社署主要係負責為弱勢社群提供福利救助嘅政府,但係佢裡面嘅特別調查組又係做啲咩,就應該唔係個個都知,所以今日都想為大家講下呢樣嘢。

今晚《逆緣》就會講到政府委派陳家樂去社署特別調查組,跟住林夏薇工作。(電視畫面)

其實社署嘅特別調查組係為咗防止市民欺詐同濫用社會福利而成立嘅,隸屬社會保障科,而佢轄下五隊就分別負責調查涉嫌詐騙嘅個案、追收有關個案款項、與各部門核對資料發現個案、覆檢個案等工作。望落就好似好正義,好能夠為納稅人嘅金錢把關。不過,為基層婦女工作多年嘅註冊社工阿Bill就對特別調查組嘅成員有其他睇法:「佢哋其實唔係社工,而且當正政府嘅錢好似佢哋錢咁。」阿Bill話調查員總會鬧到一班社會福利申請者狗血淋頭:「好多人覺得綜援好易拎,但其實好難,因為要過呢班人嘅一關,佢哋會好似查家宅咁起你底,過程當中佢哋嘅態度仲係好惡劣,要受佢百般奚落。」

根據社工阿Bill嘅講法,特別調查組對於福利援助申請人嘅態度係好惡劣。(電視畫面)

談到見過嘅個案,佢就話有幾個都好深刻:「有一個單親媽媽,因為個仔未夠15歲,所以佢唔可以出去做嘢獨留兒童在家,如果唔係就會犯法,被逼拎單親綜援。啲職員就會好惡咁質問佢,點解唔搵份高人工嘅工請個工人睇住個仔,又或者趁個仔返學時出去做Part-time,但其實呢啲都唔Work,一來好少公司咁Family-friendly就你湊仔時間,二來做Part-time喺香港係維持唔到生活。」又指有關部門不時派漏援助金。

阿Bill話曾經有單親媽媽唔敢獨留兒童在家而申請綜援,但遭到有關職員質問,話點解唔搵份高人工嘅工請工人。(電視畫面)

唔好以為呢個情況情況只會發生喺綜援身上,根據阿Bill嘅講法,好多申請傷殘津貼嘅弱勢人士,即使揸住醫生紙證明佢已經喪失工作能力,但係都會受到刁難:「有啲個案係Mental Health方面有問題,外表睇落冇咩事,例如有人群恐懼症咁,但相關職員都會用言語攻擊你,好似盤問你、審訊你咁。所以呢啲個案要申請援助時,最好有個社工傍住,啲職員就冇咁寸。」

阿Bill亦就算傷殘津貼申請人有哂醫生證明,面談時都會受到職員奚落。(電視畫面)

至於特別調查組係點樣查人呃綜援,阿Bill就話:「主要係睇你拎綜援時有冇打工,如果有打工,就要倒還,有受助人做散工賺咗三舊水,佢哋都會就呢三舊水問到你X街,變相令班弱勢人士長期處於貧窮狀態。」問會唔會覺得呢班職員離地,甚至有啲迂腐?佢就咁答:「不如咁講,佢哋其實係奉命行事,處事裡面冇咩人性、人情味,好似機器咁。」唔知陳家樂、林夏薇嘅演繹,同阿Bill嘅親身經歷爭幾遠呢?

根據阿Bill嘅講法,特別調查組嘅職員似足機器冇咩人味,唔知陳家樂、林夏薇係唔係喺劇中都係咁。(電視畫面)

除咗陳家樂入職,今晚都會有佢得知林夏薇有日本人血統,所以喺餐廳拂袖而去嘅場面:

+13
+12
+11


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。