【打蛇】極變態難頂度爆燈 忍得住睇晒真心犀利

撰文:
最後更新日期:

香港嘅Cult片點止得《山狗》一套,喺80年代可以話係拍到有個潮流喺度,有好多導演都產出咗唔少Cult片,好似牟敦芾咁先後就拍咗《打蛇》、《黑太陽731》等視覺上極度衝擊嘅變態戲,基本上可以話係挑戰人類良知,相信類似嘅戲已經因為社會規範等因素,喺依家呢個環境拍唔返。

上次講《山狗》段文出咗街之後,我喺自己facebook度Share自己篇文自High一下,點知好多朋友仔喺嗰晚就留言話有睇過其他更加痴線嘅戲,仲列舉咗一堆戲名叫我之後睇睇。幾時都話facebook唔好Add上司,結果我阿頭真係睇咗啲留言,第二日話覺得成件事反應唔錯,叫我繼續寫多啲Cult片,仲話嚟緊呢篇寫《打蛇》呢套戲先,呢套戲都係香港Cult片嘅經典中嘅經典。結果佢講完呢堆嘢之後過兩三日,我先得閒喺半夜睇佢畀我隻絕版VCD,希望我唔會因為Keep住睇變態嘢搞到變態佬,跟住喺公司做返啲我睇過嘅嘢。

《打蛇》嘅電影海報,睇返個演員列表,真係一個演員都唔識。(網上圖片)

喺講呢套戲有幾痴線幾變態之前,畀少少基本資料大家先,《打蛇》呢套戲就係喺1980年上映嘅,而導演就係牟敦芾,主要係講緊香港喺1980年10月取消咗抵壘政策,轉為採取即捕即解政策,一班中國大陸嚟嘅非法入境者就趕喺三日寬限期裡面,用游水、撐船等自己嘅方式嚟到香港申請身分證,點知喺邊境地區畀「打蛇集團」綁架,以凌辱嘅方法逼佢哋講出香港親戚電話號碼,之後聯絡佢哋畀贖金。最後,呢班「人蛇」逃出生天,但好唔好彩咁畀警察捉返。

一班人蛇經歷咗大量嘅變態嘢後,即使脫離打蛇集團嘅魔掌,但仍然難逃法網。(電影畫面)

「打蛇集團」嘅人真係當班非法入境者係畜牲,逼佢哋全裸之餘,仲玩哂滴蠟、射水柱、強姦、虐打、倒吊、火燒等數極都數唔完嘅變態嘢,我明知呢啲都係拍出嚟、假嘅,但真係覺得諗到拍呢啲嘢出嚟嘅牟敦芾個心理有少少唔平衡。當中最Cult、最癲嘅一幕,一定係「人蛇」裡面有個鬼頭仔同「打蛇集團」嘅人講,話女主角個細佬記得電話號碼,只不過佢唔講,之後集團嘅人就毒打佢,搞到女主角個細佬忍唔住爆咗句:「我知道都唔會講,唔通你會強姦我呀?」

女主角細佬因為講咗句「唔通你會強姦我呀」而面對一生中最慘痛嘅經歷。(電影畫面)

+12
+12
+12

點知集團首領聽到呢句話後就即刻淫笑,叫手下扑暈女主角細佬之後再綁佢喺板凳度,首領喺自己房不斷笑住咁用手掃女主角細佬又白又滑嘅背脊,到女主角細佬醒咗後仲用凡士林搽落佢個屁股度,之後首領就好粗暴咁雞姦咗女主角個細佬。當首領滿足完佢嘅淫慾後,就掉返女主角細佬入「集中營」,大受打擊、個樣呆呆滯滯嘅細佬突然發狂捉住首領,起勢咬對方條頸咬到血肉橫飛,就算集團嘅人點拉點打都唔放口,結果真係咬死咗首領為自己報仇,但細佬自己都畀人打到返魂乏術。

為報雞姦之仇,女主角細佬監生咬死打蛇集團首領。(電影畫面)

無論係雞姦定係監生咬死,喺視覺上嘅衝擊真係可以話係極致中嘅極致。比起《山狗》輪姦莊靜而嘅一幕,《打蛇》雞姦一幕雖然係少咗第一身主觀鏡頭嘅代入感,但就多咗一份恐怖嘅感覺,一來係因為我係男性,如果有個咁嘅變態佬對住你淫笑,又咁樣掃你背兼搽凡士林,之後仲……我諗我輕則唔敢見人幾年,重則搵個方法自我了結;二來係牟敦芾同電影攝影師都採用咗唔同鏡頭,包括中全景、中景、近景及全特寫等,以多個角度去拍呢個雞姦場面,當中齋影兩人對腳嘅鏡頭可以話係一絕,令觀眾感受到唔同層次嘅恐懼。

首領除褲一刻,我真心覺得好恐怖。(電影畫面)

故事裡面嘅人蛇固然係慘,其實飾演呢班人蛇嘅演員都好慘下。上面已經提過佢哋喺戲裡面有全裸演出,而其實呢啲冇著衫嘅畫面唔係好似依家啲戲咁,得嗰一下半下,係起碼佔電影一半嘅時間。無論係乳房、臀部,以至下體都拍得好清楚,好彩佢冇陰部嘅特寫,如果唔係都相信喺80年代咁開放嘅標準下都上唔到畫。我喺度諗,點解呢班演員肯拍呢套戲,係唔係畀導演等幕後團隊呃咗,定係佢哋爭人錢等住要還?即係火燒呢啲都有得搵特技人做替身拍,但係裸住體畀人用水柱射、倒吊呢啲真係要演員自己去做返,除咗話佢哋真係為電影藝術付出咗好多之外,我真係唔知講咩嘢好。

《打蛇》玩盡各種凌辱手段,相信即使係明知做戲,班演員都好難受。(電影畫面)

講到藝術感,如果令人嘔心真係一種藝術嚟,呢套《打蛇》就真係拎到滿分喇。我睇睇下甚至係諗起寇比力克(Stanley Kubrick),除咗牟敦芾喺戲裡面用咗好多廣角鏡拍嘅畫面,令到演員嘅表情扭曲啲、誇張啲,最似嘅一樣嘢就係女主角被集團嘅人格硬撐大對眼,逼佢睇住班裸體男人嘅下體跳彈彈,似足《發條橙》(A Clockwork Orange)裡面男主角被綁起兼被逼撐大對眼睇暴力片咁。而牟敦芾喺呈現裸體上,亦都同好多導演好唔同,好多導演都拍得裸體好靚、好唯美,但佢係做到一種令觀眾望到班演員裸體會覺得反感,甚至覺得佢哋開始唔似人,似畀人圈養嘅豬咁嘅感覺。

左邊係寇比力克嘅《發條燈》,右邊係牟敦芾嘅《打蛇》,前者比後者早9年上映,呢一幕明顯係向前者致敬。

最後嗰部分又係好正,我唔知係令套戲走咗Tone定係畫龍點睛咗,一班已經脫離集團魔掌嘅人蛇,卻因為男主角一句「唔該晒,同志」而被警察識穿身分,最後一一落網。佢講呢句嘢嗰下,我真係笑咗出嚟,因為真係太低能,但同時又灰機,搞咗場咁大嘅龍鳳到最後就係因為佢呢句嘢而衰收尾。多得女主角引開個警察,男主角最終亦去到佢哋夢寐以求嘅鑽石山,但到男主角意識到鑽石山冇鑽石得貧民窟時,佢崩潰勁叫「呢度唔係鑽石山」,又係又可憐又可笑,我有呢種感覺唔知係我被牟敦芾感染咗,定係我本身都有少少變態。至於牟敦芾其實係唔係真係一個變態佬,另一篇文再講。

【Cult噏】《打蛇》牟敦芾專拍變態片 認演員勁投訴:我拍緊事實

男主角去到鑽石山,發現只係貧民窟,同想像中好大出入,最後癲咗勁叫「呢度唔係鑽石山」。(電影畫面)

+5
+5
+5


請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。