【打蛇】牟敦芾專拍變態片 認演員勁投訴:我拍緊事實

撰文:
最後更新日期:

由牟敦芾執導、1980年播映嘅電影《打蛇》絕對唔係一套普通講非法入境者偷渡來港辛酸史嘅戲,而係加咗好多變態元素、挑戰人類良知嘅Cult片王。裡面除咗有「打蛇集團」毒打人蛇嘅場面,更有大量全裸鏡頭,當中最激、最痴線一定係女主角細佬被集團首領雞姦,以及之後細佬為報仇而監生咬死首領嘅場面,睇完成套戲都真係會覺得牟敦芾其實係變態。

【Cult噏】港產片《打蛇》變態難頂度爆燈 忍得住睇晒真心犀利

《打蛇》導演牟敦芾。(網上圖片)

而牟敦芾喺邵氏官方刊物《南國電影》度,就話自己係拍緊事實出嚟,絕對唔誇張,同埋呢套戲係有真正意義。佢亦話偷渡潮嗰時的確係有三種人會綁走人蛇要求佢哋香港親戚交贖金,第一種就好似戲中嘅職業「打蛇集團」咁、第二種本身都係偷渡客,但係搵唔到食就做呢啲勾當、第三種就係住喺邊境嘅農戶間中客串下咁,呢三種人亦都會互相鬥法。

《打蛇》裡面有大量變態情節,但牟敦芾就話佢係拍緊事實出嚟。(電影畫面)

牟敦芾亦喺《Black Sunshine: Conversations with T.F. Mou》呢套以佢為主題嘅訪談紀錄片中,指《打蛇》中嘅虐待女性情節係反映住現今社會仍然充斥住嘅重男輕女觀念,佢就舉出一個好有畫面嘅例子:喺中國,女性生小朋友嘅時間,往往隔籬都會有個水盆喺度,因為如果生出嚟嘅係女仔,就會即刻浸死佢。主持人亦都話聽過有演員話牟敦芾逼得佢哋太盡,牟敦芾就咁答嘅:「佢哋成日都會有類似嘅投訴,但你一定要說服佢哋做落去。」

牟敦芾亦承認有演員向佢投訴,話佢逼得佢哋太盡。(電影畫面)

雖然牟敦芾拍嘅戲真係好變態,但的確係一個好愛電影嘅人。1977年加入邵氏嘅佢喺紀錄片度就話自己曾經問過邵逸夫:「你每年拍成百套戲,有冇諗過畀少少錢去拍一套戲,唔好為咗票房,而係為咗拍到一齣套好戲。」但對方就只講咗句「點解我要咁做」,而佢亦都話自己喺邵氏嗰5年實在太舒服,所以先至離開香港,北上到內地拍其他想拍嘅戲。

就係因為牟敦芾覺得太舒服,所以先離開邵氏,所以先拍到更痴線嘅《黑太陽731》。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。