【果欄中的江湖大嫂】馮盈盈世界級喊戲演技受讚賞:要多謝爸爸

撰文:林迅景
出版:更新:
馮盈盈呢幕喊戲好多網民都like。(陳順禎攝)

《果欄中的江湖大嫂》星期五就是大結局,相信不少觀眾都好期待故事的發展。不過上一集就講到小狼女(馮盈盈飾)的親大佬勇哥(黃嘉樂飾)為救友美(江嘉敏飾)而被襲擊死去。當中除了江嘉敏的喊戲演得出色之外,初次拍劇的馮盈盈對在殮房認屍的一幕喊戲也同樣令觀眾拍爛手掌。

馮盈盈話場喊戲準備咗成個禮拜。(陳順禎攝)

馮盈盈今日出席手機活動時,接受《香港01》訪問。馮盈盈説:「點解大家會話我好呢,其實係因為我新人第一次拍戲。見到我喊得出已經『嘩』(拍手),已經好意外同驚喜。的而且確,我為咗呢一場喊戲,一個禮拜前已經開始準備。」

馮盈盈話可以喊得咁好,最緊要多謝阿爸。(陳順禎攝)

馮盈盈仲分享了一個拍攝喊戲之前的趣事。「嗰日拍之前仲嚇親個化妝姐姐。因為佢幫我畫畫下嘅時候,我開始喊。佢仲以為:『我係咪化得好差,整到妳』。我話:『唔係呀,我死咗阿哥。』之後我先同佢解釋返喺劇入面死阿哥。」問到馮盈盈如何培養情緒,她說:「之前幫《香港01》專訪(訪問按此)都講過,聽CAllStar嘅歌。因為我現實中冇阿哥,唯有就諗阿爸死咗,不過佢仲健在嘅。所以就,多謝爸爸啦。」

+1