【棟仁.專訪】賴慰玲直腸直肚唔怕得罪方丈:我原意都係為件事啫

撰文:
最後更新日期:

賴慰玲說話直腸直肚,與劇中丘茵茵一樣,但沒有惡意,只為做好件事。(梁碧玲攝)

【唔怕講嘢得罪人】

無綫劇《棟仁的時光》接近尾聲,當中飾演丘茵茵一角的賴慰玲,因為不平則嗚、有嗰句講嗰句、連上司及老闆都開波的性格,令不少敢怒不敢言、在公司正職是受氣的打工仔,也為她的表現而不自覺鼓掌。原來,現實中的賴慰玲也是個大情大性之人,她亦覺得與丘茵茵的性格很接近,更試過與上司據理力爭:「丘茵茵只不過有嗰句講嗰句,兼唔識去修飾啫。其實我自己有時都會咁架,但都講咗先啦,因為我係個嘴快過個腦嗰啲人。事後會覺得『死啦,點解講咗呢啲嘢嘅?』」

難道就不怕「方丈份人好小氣」?她說:「無嘅,基本尊重係一定要有,唔等於唔尊重上司,我原意都係為件事,又唔會搞到返唔到轉頭咁誇張。有時覺得自己無乜禮貌,咁咪『唔好意思,我頭先係咪無禮貌?』我會問返嘅,對方知道我係為件事就ok無問題啦。我以前可能無咁夠膽去講返件事,但大咗之後會覺得講完後大家心裡就唔使有條刺,同埋都係講一句啫:『喂,你今日係咪覺得我太粗魯?對唔住。』即係好小事就可以令到人與人之間無咁多隔膜,何樂而不為呢?」

【被重用的TVB非親生女】

或許正因這種真性情,令賴慰玲在被喻為「大染缸」、是非多、你不犯人人自犯你的娛圈電視城中,成為真真正正只為演好戲的好演員。「我諗我係一個真正演員囉,大家搵我係做戲,而TVB同我嘅關係就係你俾戲我做,我幫你做戲囉。我覺得咁樣純粹啲,啲嘢亦會簡單啲,剩係拍同唔拍。」

所以至今她仍未成為TVB親生女,但TVB仍繼續找她拍劇,且角色並非只是客串、充當二打六,更多是配角,甚至女主角之列。想必會令不少在TVB打滾經年,但仍未被重用的親仔女眼紅吧?「無喎!我諗大家都知道我係個剩係想做戲嘅人,我無顧慮咁多呢啲嘢,所以呢啲嘢就自然唔關我事,只要你知道自己個重點係咩啫,我係咁覺得囉。同埋我生仔過去呢大半年好耐無返TVB,唔會造成有競爭啦,有劇時我就返TVB,無劇時我就湊仔。」

「我去咗生仔,大半年無返TVB,有咩好競爭啫?」

【演得之人】

在圈子內不爭,或者更易建立正面形象、更易構築自己關係良好的人脈,但不一定令你的工作機會接踵而至,畢竟實力很重要。賴慰玲可說是兩者俱備。「5年喎,我人生最青春嗰5年,由20歲讀到25歲都投放咗喺演藝學院度。呢5年演藝學院嘅旅程入面係幫咗我好多,最簡單嘅係你攞咗劇本點分析吖?唔係個個識架!起碼我會識得點樣進入一個劇本、知道點去分析劇本、點樣做得更加好、點樣做資料搜集。呢啲係我嗰幾年不斷去學習嘅嘢,所以我嘅優勢就係我有一定嘅基礎先再行入電視圈囉。」同理,同樣來自演藝學院、舞台劇出身的蝦頭和泰臣,一樣很演得。

【棟仁.專訪】賴慰玲結婚生仔大過天 買唔買樓擺唔擺酒都係次要

【棟仁.專訪】賴慰玲拒當虎媽 但難免被牽著鼻子耳濡目染

賴慰玲專業打工仔的神演出。(節目截圖)

+9
+8
+7

【《棟仁》(動人)的胎教】

演得,是否就代表埋位拍攝一take過?賴慰玲自信地說自己很少NG,不過拍《棟仁》時林子善卻常「累」街坊:「佢唔係唔記得對白,唔係唔記得做咩,而係佢諗到好多嘢玩,佢可能做做下戲突然間:『咪住先,呢個位我想再加啲嘢。』佢呢條友真係好多嘢玩。不過大家都好鍾意佢嘅,有佢喺度氣氛好好多。你知我哋通常係office戲,如果大家都好認真係好悶,出嚟你未必想睇,但有佢喺度成個office即刻生猛晒,你個office有個好玩嘅人先無咁悶架嘛。」

難怪賴慰玲說雖然佗B時正在飾演很多牢騷的丘茵茵,但不會影響她的胎教,一來演戲是假的,不是真情緒,二來是拍攝時氣氛融洽,與袁偉豪、黃長興、林子善等人相處得很開心,因此更偏向「俾咗好多好開心嘅能量BB,係最好嘅胎教」。

林子善常NG累街坊。(官圖)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。