【棟仁．專訪】賴慰玲唔想做虎媽 但承認身邊太多虎媽好易受感染
撰文：梁子健
出版：更新：
「虎媽」一詞大家都不陌生，更何況賴慰玲。初為人母，她希望兒子的成長隨緣就好。
「我係一個超級隨緣嘅人，因為我屋企人都係咁湊我，我由細到大想做咩就做，只要你係確保到自己安全，我搵你搵得到，咁就得架喇。我係希望睇下個小朋友性格係點先，跟住再去開發佢囉，即係最緊要係佢自己想點樣。」
幾個月大，親子時間已是睇書講故事，虎媽是這樣鍊成的。雖她說一切都是別人送的。（IG圖）
話是這麼說，但一街虎媽，難免耳濡目染。
「係架，最近有個遲我兩個禮拜生小朋友嘅朋友，佢都問我：『幫佢報咗Playgroup未呀？』我話佢4個月咋喎，使乜咁快？佢話：『報得嚟差唔多架喇。』我身邊有好多虎媽，我唔知佢哋會唔會傳染埋我，搞到我都變埋虎媽。」
+2
多問兩句，再提提孩子成長後讀書時的情況，隨時被其他虎媽養育的小朋友比下去，賴慰玲就由最初「唔知會唔會」，變成「我覺得自己好大可能變虎媽」。
「就係因為身邊啲人囉，當我話是但啦入邊間學校都得，身邊人就話：『唔得架，呢個學校咩咩咩啲架。』當你身邊好多呢啲人嘅時候，我就會：『咁好啦，咁我揀間好啲架啦。』跟住入咗一間好學校，可能頭一星期佢唔識一至十，但啲同學識晒一至十嘅時候，我就會：『死喇！阿仔快，阿媽同你補習。』真係可能會咁樣。不過，我始終希望唔好忘記自己所講嘅就係，我希望先發掘佢，即係佢要配合呢個社會，某程度上都係需要架喇，但我希望佢喺配合呢個社會嘅時候唔好失去咗佢自己嘅本性。」
「理想與現實」五隻字，你懂的。