之前講咗新浪潮導演余允抗拍攝變態Cult片《山狗》時嘅事，依家就要講下另一樣大家都應該有興趣嘅嘢，就係點解佢咁快就唔再做導演，成個電影生涯只係執導咗7套戲咁大把，而收山之後又點解無啦啦做咗上市公司主席。余允抗接受訪問時就講返點解會收山，佢話唔再拍戲都係主要因為一個人：「最主要就係因為我結咗婚。你知啦，啲電影人成日去飲咖啡，美其名就係講故事，但其實大半時間都喺度Hea，邊度有咁多橋可以度。」余允抗話佢老婆婚後成日投訴佢晚晚天光先返屋企，收入又唔穩定：「一諗到第日生小朋友後，九百幾樣都係同錢有關，就決定唔再拍戲，仲要係一刀切，以後掂都唔掂。」之後佢就好快同麥嘉、黃玉郎、黃百鳴等開公司投資物業、股票，正式轉行做商人。

【專訪】余允抗最滿意作品竟然唔係《山狗》　最後答案包你估唔到

喂，唔係喎，當時電影業都好輝煌，新藝城嗰啲做下風山水起，應該都好好搵架，但余允抗就唔係咁睇：「好老實，我拍戲時收入都算係中上，但係做電影係好得意，每套戲都係唔同生意嚟，每開新戲都係一個新嘅歷險，唔似出嚟做投資，有一下成功咗之後都一帆風順。」我明明哋又唔係好明咁，始終都係覺得做自己鍾意嘅事比較開心、過癮，佢就話：「你覺得拍戲刺激過做生意啫，但係我覺得做生意刺激好多。」我問點解，佢就話再講就係另一個故事，一個唔關電影嘅故事。

所以都係講返電影。我問余允抗一直以來有冇心癢癢想拍返戲，佢好老實咁答我：「冇就呃你！」不過佢話就算個心幾痕都唔會行動，因為個規則同以前真係好唔同，十年前就因為市場萎縮得好犀利，十年後嘅依家就係因為唔係話套戲要上就上到：「講緊嘅係中國市場，每拍一套戲都要諗通唔通得過，個劇本通過到先有老細肯畀錢拍，影響咗成個電影業發展。」離開咗影圈30年，咁其實余允抗到依家其實仲有冇睇戲呢？我哋另一篇文再講。

【專訪】余允抗唔做導演照關心電影業發展：依家的確係青黃不接