【早霸王】23歲仔無句真連朋友都睇唔過眼 女方狠飛兼全面封鎖

撰文:
最後更新日期:

森美話唔少男人落酒吧純粹為「把妹」,但佢就覺得把妹都應該要誠實。

俗語都有話醉翁之意不在酒,男士們落酒吧多數都係為咗識女仔,就好似今日《早霸王》「你知道唔知道有人掛住你」環節當中呢位主角Lesile咁,半年前喺酒吧識咗Gigi。「傾落之後覺得佢同平時喺酒吧識嗰啲女仔唔同,份人比較單純同可愛。」之不過,由於Lesile一開始諗住玩玩吓,所以向Gigi虛報唔少資料,例如話自己屋企曾經好有錢、又話自己有出國留學。「佢唔鍾意我做gym、打拳,因為個場有好多異性,我就暪住佢繼續去。」

繼上星期表白慘遭拒絕後,今個星期連電話都無人接……

到底Lesile係出處咩居心呢?相信只有佢自己先知,不過原來除虛報家底、學歷之外,就連年齡都係假,原因係「佢大我8年,所以我要呃佢。」原來呢啲曾經出現過喺《精裝追女仔》的橋段,今時今日仲會發生!

或者係因為太多謊言,所以連身邊嘅朋友都睇唔過眼,將Lesile的「惡行」逐一踢爆。「我同佢拍拖無耐之後,我啲朋友同佢講有幾衰、又話我試過撬長腳,後來我feel到要分手,所以係咁chur佢。」最後當然是分手收埸,而Gigi亦將Lesile全面封鎖。「佢令我有種好sweet嘅感覺,同呢23年見過嘅女仔唔一樣、真係好可愛。」

23歲仔,到底見過幾多女仔呢?到底知唔知咩叫誠實呢?就連森美都好語重心長咁話「愛情唔可以玩,一開始就要有責任,一段關係建築在謊話之上,對方以後要點信你?」或者係連個天都唔想幫Lesile,電話雖然打通咗,但就無人聽,在空氣中表白嘅佢就話:「呢半年呃咗你好多嘢,好對唔住,亦知道無資格、面目搵你,但希望你聽到呢個留言後,可以原諒我,大家再重新一次。」相信Gigi就算再單純都會識得點揀。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。