《詭探前傳》終開拍 麥子樂預告重量級演員加盟:有佢我更想演!

撰文:
最後更新日期:

網民期待已久的《詭探》第二季終於落實開拍!

ViuTV去年5月推出自製劇集《詭探》,邀得「大佬孝」邵仲衡擔任男主角外,亦請來尹揚明、車保羅、蔣祖曼、駱振偉、楊偲泳、陳子豐、張雷和劉錫賢等一眾新舊面孔於劇中共冶一爐,陣容頗有新鮮感,加上此劇走懸疑驚慄路線,故事又以本地恐怖都市傳說作主打,所以劇集播出後旋即掀起話題,撞正大台推出「十年倉底貨」《蘭花劫》,當時據內部消息人士報料,《詭探》首播後曾錄得平均收視2點,最高則有2.3點,以每點大約6.4萬人計算,最高有大約14.7萬人收看,但以數碼99台黃金時段向來只得0.5點至1點收視而言,《詭探》的收視已較其他節目急升一倍。

原本開個好頭,奈何資金不足,《詭探》劇組只能夠找到新晉編劇撰寫故事情節,直接影響劇本質素,中段開始後勁不繼,去到最後甚至爛尾,網民看罷紛紛爆粗洩憤。不過另一邊廂,《詭探》結局本身已埋藏後續伏線,去年10月ViuTV率先宣布開拍《詭探2》,正當大家認為必然是上季故事延伸,ViuTV今日在其官方facebook專頁講出最後答案 ── 說好的續集原來是《詭探前傳》,並且公布三位男主角的人選:麥子樂、游學修、陳安立。

劇組認為麥子樂跟尹揚明頗為相似,所以邀請他在《詭探前傳》飾演年輕版「忠Sir」(資料圖片)

據了解,《詭探前傳》劇組早於3月底已聯絡麥子樂,他將會在劇中飾演尹揚明一角,即「忠Sir」(張漢忠)的年輕版。「(劇組)佢哋話覺得我好似(尹揚明),哈哈,我又唔覺得好似嘅,但40歲人仲可以演後生版,係幾興奮嘅一件事。」子樂1月生日,現時他才38歲,仍未到不惑之年。

劇本寫齊不怕爛尾

子樂直言,新劇大部份內容於下周三(6月20日)記者會舉行前依然要守秘密,現階段只可以透露,自己與游學修和陳安立將分別飾演三師兄弟,游學修的角色長大後就是邵仲衡飾演的司馬志全,而身材高䠷、車保羅飾演的徐八強(八爺),年輕時代的他會由同樣高大的陳安立扮演。

「話明係前傳,即係演佢哋嘅後生版,講緊嘅年代應該係80、90年代,個戲應該係講我哋三個師兄弟去跟一個師傅去學啲捉鬼嘅嘢。」問到師傅一角,將會由誰人飾演?子樂再賣關子:「唔講得咁多,唔透露得,呢個到時(記者會公布)就會覺得好正,我都係因為呢個原因,更加想接呢套劇,但而家唔講得住,到時大家就會知。」正因為有這位重量級演員加盟,所以子樂坦言今次劇本該有質素保證:「梗係有信心啦,因為呢位演員係好資深,(劇本)應該要過佢嗰關,佢都Pass(過關)的話,我冇理由會覺得唔得。」他補充,《詭探前傳》的劇本已寫起,預計於今年7月正式開鏡,整個夏天都要開工。

邵仲衡在《詭探》飾演的司馬志全,年輕版將由游學修演出。(資料圖片)

三度扮演年輕版劉松仁

談到今次於《詭探前傳》飾演主要角色的年輕版,子樂自信十足,因為早在無綫拍劇的年代,他已試過很多次:「以前做過好多演員嘅童年版,單係劉松仁我已經扮咗三次,分別係《歲月風雲》(演華文翰,2007年播映)、《原來愛上賊》(演高哲,2008年播映)同埋《蔡鍔與小鳳仙》(演蔡鍔,2009年播映)。」

對於要掌握年輕版「忠Sir」一角的應有情緒,子樂認為正因為要演角色的後生時代,揣摩角色時反而沒有那麼多障礙,「我成日喺度諗,係咪要學番佢大個咗嘅行為去演呢?其實我嘅創作空間仲多,因為可能係佢(角色)老咗先會變成佢而家咁樣,所以我應該唔會好刻意咁去學佢啲嘢囉。」他說與劇組會面時,對方已略略說出演繹方向:「可能佢哋想我做到好滑頭,咁我可能就會做得更加滑頭,但係我盡量都會睇多啲尹揚明嘅戲,睇吓有冇佢嘅特質可以用到。」

尹揚明於《醉生夢死之灣仔之虎》一戲中襯托主角任達華的演出,令子樂相當深刻,回味再三。(網上圖片)

子樂說,年輕時經常有看尹揚明的電影,「我都睇佢好多戲,我本身都幾欣賞佢,佢好有型,佢演咩戲都得。」首推例子是《醉生夢死之灣仔之虎》(1994),尹揚明在戲中飾演阿洪,他覺得這部戲很好看。「我成日睇重睇,戲入面,任達華係主角,佢係配角,成日喺旁邊襯托任達華,我好欣賞呢啲演員,因為我喺TVB出嚟都係做好多呢類戲,其實呢啲戲係好難做,你又要突出自己,又唔會搶到主角鏡,又要人哋記得你呢,係好難演嘅!」

「八爺」車保羅一角的年輕版將由陳安立扮演。(資料圖片/圖右:梁碧玲攝)

加快熟絡開設WhatsApp群組

在《詭探前傳》裏,子樂將首度和游學修和陳安立合作,原來他與游學修常常踢波,亦試過一起參演方皓玟的《Let's Say》MV做地產經紀,「同游學修一齊拍劇就真係未試過,我覺得佢好叻,我好欣賞呢個人,因為佢唔單止表演了得,佢亦好有腦,有好多嘢Input入去畀個角色,我深信,我哋兩個火花一定會好好,同埋我同佢熟,好多嘢好易傾好易講。」

至於跟陳安立的相識,同樣在足球場上,「我本身冇同佢拍過嘢,佢係一個好積極嘅人,我好鍾意呢啲人,你見到側邊有兩個都咁積極嘅後生仔,你唔可以揼慢自己,你都要睇吓去撞到啲嘢。」為了令彼此加快熟絡,子樂說現時已和游學修、陳安立開設三人WhatsApp群組。「我哋要做三師兄弟,但我哋本身嘅關係未去到咁close,所以我哋要嘗試去混熟,呢個係科技的進步。」

游大東其他文章:

【林燕妮逝世】黃霑34年前譜曲詞 《倩女幽魂》插曲暗藏政治意思

【大叔的愛.評論】難得沒加鹽加醋講HeHe 港發展性小眾劇路遙遙

《深宮計》對白過份「撚字」 古語突然現代化:「你講嘢一嚿嚿」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。