【父親節】劉丹笑指要交戲扮驚喜 孫女見父母方法竟然係睇電視
撰文：冼燕珊
出版：更新：
今天就是父親節，身兼爸爸和爺爺的劉丹，昨日出席劇集《愛・回家之開心速遞》宣傳活動，表示每年父親節，囝囝劉愷威都會畀驚喜佢，「每一年佢哋都扮到好神秘，我就算知少少都扮唔知，到時交啲戲扮吓驚喜。」問到邊年父親節最驚喜，丹爺就話年年都有啲唔同嘅驚喜，而隔離豹哥單立文就問：「生孫女嗰年驚唔驚喜吖?」丹爺連連點頭話：「嗰年梗係驚喜啦。」
丹爺話年年父親節屋企人都會安排驚喜畀佢，佢講笑話知都要詐唔知，到時扮驚喜。（葉志明攝）
今日就係父親節，不過丹爺就話阿仔劉愷威前幾日先離開香港，無咁快返嚟，所以唔會正日慶祝：「其實個個禮拜都慶祝父親節，做我哋呢行都慣咗，大時大節都唔係正日慶祝。」
丹爺話抱孫嗰年最驚喜。（葉志明攝）
問起孫女小糯米狀況，丹爺笑晒口話：「佢剛剛過完4歲生日，佢依家好多嘢玩，又學跳舞又學唱歌，成日自己喺屋企跳舞唱歌。」問到小糯米父母長期唔喺身邊，而佢自己又忙拍劇，咪得返嫲嫲陪小糯米？丹爺話：「盡量抽時間陪佢，同父母就視像通訊，而且佢哋一有時間都會返嚟。」豹哥聞言講笑咁話:「睇TVB就見到晒啦，日頭睇《皆大歡喜》就見到Daddy，前排 7點（《三生三世十里桃花》）又見到媽咪。仲有8點睇《開心速遞》見到爺爺㖭！」
小糯米如果掛住爸爸媽媽同爺爺，開TVB 就見到佢哋。（葉志明攝）