【開心速遞】單立文豹嫂結婚十年未生子　睇相被批2020年有小三　

豹哥單立文今日出席《愛・回家之開心速遞》宣傳活動，同一眾老友記慶祝父親節。豹哥同豹嫂胡蓓蔚結婚十年至今未有小朋友，豹哥早前仲自爆有知名相士指，如果2017年佢哋都未有小朋友嘅話，豹哥同豹嫂就會出現婚姻危機，仲話到2020年豹哥就會出現小三。

豹哥豹嫂一向係圈中嘅模範夫妻，對於被相士批佢哋之間會出現第三者，兩人都以輕鬆態度面對，豹哥話老婆開始估定「小三」係邊個，豹哥話：「佢已經開始估緊，縮窄緊範圍，成日問係咪呢個，係咪嗰個，邊有咁快吖，其實距離相士所講嘅時間仲有兩年，成日問我係咪將會係呢個，我話個小三可能係『啤啤』（劇中熊家所養狗仔）囉。」