【早霸王】男聽眾唔肯斷聯前度 現任拒再比機會: 我哋分開左啦

撰文:
最後更新日期:

「男人係心痕架啦」

星期五限定的《早霸王》「你知唔知道有人掛住你」雖然成功撮合過唔少情侶,但當中亦有失敗例子,就好似今集男主角Gary,電話一接通,佢就表明係想同已經分手兩個月嘅女友復合,但都不禁表示「我知難度好高。」Gary透露分手導火線係因為前度的出現。「前度一直想復合,有要求見面,我一時心軟……」Gary都未講完,森美就已經話「男人係心痕架啦」Gary之後更指同前度見面時,將現任留在家中,而原本打算見吓就算,結果見足成晚,但佢就發誓無做出壞軌行為,女友當然嬲到出煙,但因為太愛的關係,所以二人好快就和好如初,而Gary亦應承女友唔再同前度聯絡。

森美同小儀好一致咁認同「前度唔係friend。」

之不過,前度好似唔死心一樣,繼續有搵Gary,亦好快咁被現任發現。「佢接受唔到我同前度聯絡,我有話佢知係因為公事,佢覺得我呃佢,無話佢知我有回覆前度嘅訊息。」既然係清白,但又要忍瞞,男人是否都一樣?!森美就話「前度都要關心,但當愛情無咗之後,前度就唔會再係朋友架啦。」與此同時,森美就覺得現任似乎幾大醋意,Gary就話「因為佢想百分百佔有我,同埋佢得23歲。」並謂提出分手前,現任曾經提議約埋前度出嚟講清楚,但Gary認為無必要所以作罷。
 

Gary箍煲失敗,森美唯有安慰佢等多十年八年,睇吓對方會唔會被其堅持所感動。

森美認為箍煲機會唔係無,電話接通後,Gary情緒似乎有少少激動,但都將情深說話講出。「我係Gary,有無赫親你?對唔住,我知道唔應該再搵你,因為大家都想復原,但再唔搵你我哋感情真係無,其實我一直好掛住你,我知你一時間唔可以接受我,或者我哋可以比個機會大家?希望你可以原諒我,下星期一齊去睇show,你願唔願意?」雖然電話另一方好冷靜咁話:「我哋分左手啦。」但Gary都不願放棄,並要求對方比多次機會,但最後仿然係換來再一次失望。「其實機會一次一次咁畀你, 我哋分開左啦……」前度永遠是愛情的最大威脅者,既然Gary講到咁愛「現任」,又何必同前度繼續聯絡呢,就算say個hi都係死罪嚟架。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。