古天樂被誤以為拍戲受傷 原來係剃鬚刮傷血流不止

撰文:
最後更新日期:

古天樂昨日(10日)出席香水品牌活動,但古仔接受訪問時就透露當日早上發生了流血事件。一眾記者誤以為古仔拍戲受傷,誰知古仔回答令人驚訝:「早上起身剃鬚嘅時候剃到流血,剃完想止血,但止咗成個鐘先止到血,搞到成口都係血。今日自己工作都好忙碌,我都怕影響今日行程。」不過呢啲嘢古仔都覺得係小事,所以就唔洗去醫院啦。古仔笑言:「頭先就比較擔心,因為止唔到血,好彩最後都止到血。」

古天樂為香水品牌設計香水。(葉志明攝)

大家都知道古仔係事業強人,而家工作上仲有幾部戲拍緊,但有一件事佢覺得好辛苦,就係炎熱嘅夏天。古仔直言:「近排天氣好熱,我哋夏天時間拍緊冬天戲,又著皮褸,比較辛苦。」講開消暑方法除左飲水外,古仔話佢自己嘅解暑方法有少少奇怪:「我就比較奇怪,著咗套戲服就唔除,因為一著一除有時候適應咗,著番仲熱,同埋保持心境平和就會好啲。」

古仔自爆今朝喺屋企剃鬚剃到止唔到血。(葉志明攝)

今日見到古仔眼中有紅血絲,其實會唔會係古仔拍戲太忙令到自己冇乜時間睡眠?古仔笑言:「其實因為自己唔太識得洗面,洗面嗰啲(泡泡)入咗隻眼裡面,所以我每日沖完涼要成個鐘先會冇紅血絲,而平時睡眠確實唔足夠,不過都會盡量爭取睡眠。」

古仔笑言隻眼成日有紅血絲係因為唔識洗面,令到洗面嘅泡泡入眼。(葉志明攝)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。