【特技人】李君妍Bra Top打拳突圍 《功夫新星》出道捱足10年

撰文:黃欣華
出版:更新:

李君妍最近在新劇《特技人》中身穿低胸Bra Top與傅嘉莉打拳一幕,成功突圍,被網友稱作「全劇最醒神亮點」。雖然李君妍入行以來大多飾演3、4線的配角,但有樣有身材的她一直深受網友喜愛,今次的演出更成功搶去一班主角的風頭。

雖然角色搶眼,但李君妍就自爆拍攝前擺了個大烏龍,她稱:「本身《特技人》我都以為我係做特技人,我諗住係一個硬朗啲得嚟又特別啲嘅造型,仲走去問監製我可唔可以去染一個灰灰黑黑嘅頭添。去到試造型嗰日,我先知原來我唔係做特技人,係做依家呢個𡃁模的角色。〈冇得拍打戲會唔會覺得可惜?〉唔會,因為我拍打戲前要練一段時間,花嘅時間比較多,而朱朱本身有舞蹈底,拍起上嚟都好專業。」

對於自己要性感上陣拍打打拳戲,李君妍就透露事前沒有Keep定身材:「因為咁啱嗰陣我谷M,又忍唔到口食咗好多嘢,所以好擔心自己肥咗。〈今次算唔算從影以嚟最性感?〉算係露得最多,但之前都拍過要露晒成個背脊嘅,但露事業線呢一部劇就露得最多。我平時好少咁做,所以都有啲唔自然,可能觀眾會發現我有啲寒背。」李君妍又透露嚟緊角色會有感情線,觀眾可以期待一下。

君妍透露角色將會有男朋友。〈受訪者提供〉

李君妍2009年入無綫電視藝員訓練班,2011年當年參加《功夫新星》而為人熟悉,隨後亦獲得不少演出機會,但都只係3、4線的配角。入行將近十年,李君妍今年終於成為了TVB的「親生女」,正式簽約成為旗下的藝人,她坦言有加工又相信角色方面會越來越好:「我都有同公司傾過,想自己嚟緊嘅方向想行型格的女人,有女人味得嚟又型,希望會有多啲新工作。」