【特技人】譚俊彥否認踢走馬國明拍《法證先鋒4》 ︰我唔係男一

撰文:
最後更新日期:

備受TVB力捧的譚俊彥今日(17日)同一眾演員為熱播新劇《特技人》造勢,談到他在劇中以嚴肅爸爸的身份教授兒子性知職一幕,令觀眾邊睇邊笑。譚俊彥稱拍攝時一點也不尷尬,仲透露還是自己有份度,他笑言:「唔尷尬,我度嘅。本身場戲都係話要教小朋友呢方面嘅嘢,但我就將對白同特技人結合,想以含蓄嘅手法表達俾觀眾睇。(係咪想展示自己私下搞笑的一面?)又唔係嘅,其實係想生活化啲。」

大志哥勁正經教性知識,笑死一班觀眾。〈《特技人》劇照〉

至於有傳梅小青監製的劇集《法證先鋒4》飛起馬國明由譚俊彥頂上做男一,他聞言:「我都唔係男一,其實男一好含糊嘅,《天命》我都覺得自己唔係男一,其實係展鵬。我覺得《特技人》先係我第一部真真正正嘅男一。至於《法證》我同小青姐開會嘅時候係有三個男仔,我只係其中一個,我真係唔係男一,可以話係三男一,我係做警察。(另外嗰兩個係?)唔講得呀!(好對手?)我真係唔知。其實有啲網友心水清都估到,因為馬明拍緊其他劇。(所以佢無時間拍?)係呀。」

譚俊彥連續5部劇做男一,備受爭議。〈黃國立攝〉

另外,譚俊彥又透露月尾將會一家四口去旅行,他稱:「個女開始唔睬我,佢好明顯親媽咪多啲,瞓覺都推開我,好傷我心。(會唔會放多啲假陪佢?)會呀,拍完《十八年後的殺人告白》會即刻同屋企人去旅行。(爸爸狄龍過兩日生日?)係呀,但要開廠陪唔到佢,佢同我個仔生日都好近,所以到時再一齊慶祝。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。