李佳芯都諗過唔撈:每一日拍通宵唔夠訓嘅時候都好想放棄

撰文:
最後更新日期:

李佳芯現在成為無綫一綫花旦,但原來都試過9個月冇工開。

《BB來了》播映後,李佳芯人氣更盛,拍完《白色強人》亦將為新劇《殺手》開工,昨日(23日)Ali趁空檔出來揾真銀,這一刻的她事業順利,有劇拍又有外快揾,但原來她亦曾面對過逆境,初入無綫時,連路人甲這個機會都沒有,她說:「如果你講入行嘅話,咁初初都係由唔識開始做起,由一個路人開始,所有事都要從頭適應,從頭去行咁呢個過程重新開始都唔容易,我入嚟tvb年紀唔細,無論朋友圈或者各方面,譬如收入都要重新開始,一定會遇到困難,但係我成日覺得你只要知道自己鍾意做嘅係乜,知道自己做緊乜,好快你就會咬緊牙關好快渡過,好多事情都係咁。」

 

2014年李佳芯拍《單戀雙城》,初入無綫的她戲份只是閒角。

即使你正在追夢,實踐的同時總會遇到挫折,亦會有放棄的諗頭,Ali亦不例外,她說:「我諗我每一日拍通宵時候都好想放棄,每一日唔夠訓,冇得訓時候,要你第二日兩個鐘頭返去化妝,都好想放棄,但係有時候呢啲係情緒…人嚟嘛,點都會有情緒,你去面對呢個情緒,你會發覺…發下脾氣唧,諗下唧,你兩個鐘頭後訓醒又會發現另外一個光境嚟,唔好將負面情緒睇得太大。」

《名門暗戰》李佳芯飾演Ivy,粉絲應該記得,這套劇之後,她的機會越來越多。

「無得訓」好少事,對藝員最辛苦的是等機會,不知何時有工開的等待,才是最折磨,Ali亦試過這種滋味,她說:「我由細到大條路都唔係行得好順個啲人嚟,由其係工作上,你諗下我30歲先知道自己鍾意拍劇,你就知道我30年嚟過緊乜生活,我都諗唔番起,如果你講拍劇,我都試過9個月冇劇拍,一個入到嚟只係想拍劇,點知道9個月裡面連好細嘅角色一個過鏡都冇,咁我都…最後都係咁渡過所以…當然啦到你Suffer一啲唔好狀態嘅時候,你自己點去做好準備好緊要,好多人都會自怨自艾,好容易係咁loop呢個負面情緒,因為你就係負面情緒到嘛,但係你同樣係一個際遇唔係咁好時候,你點做好準備呢,咁你話做演員嘅準備咪睇多啲戲,上堂學下多啲唔同嘅事,因為做演員太多事需要做準備,太多事可以學,係你做準備過程,你可以忘記好多唔開心事或者煩惱,所以呢個都係當時可以做嘅事。」
 

《BB來了》為李佳芯的代表作,有收視亦有口碑。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。