袁偉豪為《鐵探》地獄減磅：夜晚淨係食一個蕃茄

袁偉豪今日〈5日〉現身祝賀好友黃宗澤蠔吧開張，阿Ben稱自己偏愛海水味較重的蠔，他亦會買蠔回家，自己開蠔來款待朋友。對於投資生意，阿Ben都表示有興趣：「好似Bosco咁，都唔係一朝一夕嘅事，都要好多時間去了解呢個市場，自己又要有心機再加埋要有一班好好的伙計，咁我覺得飲食都可以諗，沖下咖啡，可能開Café。」

對於主演的劇集《鐵探》剛煞科，阿Ben稱為角色減磅，相當辛苦：「依家休息咗幾日，就肥返少少，遲啲劇集出再俾啲相大家睇下，因為都減咗好多，嗰陣夜晚淨係會食一個蕃茄。終於都過咗啦，劇組都好滿意效果。」

阿Ben亦指能夠與兩位前輩惠英紅和姜皓文合作，獲益良多：「紅姐氣勢好勁，開頭同佢對戲都有啲驚，但熟咗捉到個節奏，大家都玩得好開心。而黑哥係電影人，我成日問佢拍電影同電視劇有咩分別，都成日交流心得，我覺得都係好難得嘅一件事。」阿Ben就透露正在休息中，亦計劃離開香港放吓假。