【搭上高鐵愛旅行】劉穎鏇被陳展鵬整蠱？ 「食完即刻反胃想嘔」
撰文：吳子生
出版：更新：
劉穎鏇（Tiffany）今日（6/9）一身休閒服飾，出席中環著名時裝品牌活動。「今日係我第一次着闊腳褲，着出嚟又幾好睇，效果好好，因為過往都係着貼身運動褲多，其實我對襯衫冇乜研究，本身我好簡單，以前選港姐我都唔識化妝，所以打扮真係唔係我強項嚟。」
Tiffany自稱膽小鬼，見到螞蟻都會驚（陳順禎攝）
Tiffany早前拍攝無綫旅遊節目《搭上高鐵愛旅遊》，夥拍何廣沛做主持，遠赴中國內地6大地方，廣州、桂林、汕頭、廈門、杭州及北京，唔少得品嘗當地美食。「今次我哋去咗6個唔同嘅城市，每一個地方都有佢哋特色，令我大開眼界，最深刻記得有次陳展鵬、何廣沛叫我食『啫喱』，食前仲要加啲醬油調味，食完之後，佢哋問我好唔好食，然後話我食嗰個喺『蟲啫喱』，我成個人毛管戙即刻想反胃好想嘔。」
Tiffany修身成功，全賴晚餐戎食澱粉質食物（陳順禎攝）
遊遍中國內地6大城市，拍攝時正值炎夏，Tiffany透露最辛苦喺桂林拍攝，因為當地有好多山環境好靚：「我哋好多時候會喺冇遮掩嘅情況下拍攝，我同廣沛啲汗係咁流冇停過，天氣真係太熱，大家都拍到見頭暈差啲中暑，好在劇組帶咗好多水準備，覺得頂唔順就上車休息下。」