【再創世紀】黎振燁曾放棄演員夢 太太安慰:唔好再諗養我唔起

撰文:
最後更新日期:

現年32歲的港男冠軍黎振燁(Jackson)最近在熱播劇集《再創世紀》中飾演熱血工頭,憑沉穩的演技,在劇中表現亮眼,得到不少觀眾讚賞。「我都唔知哪來嘅力量令我繼續做演員。」Jackson回想起自己2009年毅然放棄做前途本應無可限量兼高薪厚職的時裝設計師,而去參與無綫電視第23期藝員訓練班入行,做足八年「茄喱啡」,更曾為收入不得不全身塗滿藍色的顏料扮「阿凡達」,Jackson都笑言這些年來,自己多多少少也有些不堪回首的往事。

Jackson劇中不時要大聲發表工人意見,他笑稱拍攝時差點喉嚨痛。(電視截圖)

+4
+3
+2

「參選香港先生真係我人生一個重要的轉捩點,因為終於有人認得我同埋得到依家嘅機會。」Jackson透露參選前,曾想過要放棄多年的演員夢,找一份正職腳踏實地生活,他稱:「我試過同太太講不如我做返設計師或者將演員轉做part time,因為我繼續做落去,可能都係一事無成。」但在Jackson對自己前途感到徬徨無措時,Jackson太太就安慰說道:「其實我依家份人工都OK,唔好成日諗養我唔起,你全心全意去做你的事業啦」,太太的這段話令Jackson至今仍相當感動。

咁好嘅女人邊度搵!(IG圖片)

Jackson奪得港男冠軍後,理應備受公司力捧,但同屆的亞軍丁子朗工作機會明顯較Jackson多,發展亦比較好。問到會否羨慕丁子朗,Jackson表示:「梗係唔會啦,我都好開心佢有咁好嘅發展。我入行咁耐咩都睇化晒,每個人都有自己獨一無二嘅路要行,最緊要做好自己。雖然我條路行得比較長,行得唔係好,但相對地可以磨練到自己,令我有一個好嘅底子。我成日覺得自己無頭段嘅努力,依家肯定死梗。啲人成日話我無嘢做,其實我keep住都有工開,只係劇集拍完,可能隔成年先出街,大家嚟緊都會多啲見到我」

Jackson稱入行多年,咩都睇化晒。(圖片來源:視覺中國)

Jackson亦透露自己是個積極而且有鬥心的人:「男唔男主角,我唔會諗。但我希望以後會想有一個可以代表到自己的角色。我覺得努力係好基本嘅嘢,但有時唔需要太強求。其實有足夠嘅努力,條路自然會出嚟俾你行,我都希望演員能夠成為我終身事業,亦都能夠靠呢份職業養家活兒。」

劇集《是咁的,法官閣下》是今年台慶劇之一。(IG圖片)

忙着拍攝《機場特警》的Jackson亦透露除了忙於工作,最近亦積極與太太實行造人計劃,他稱:「我哋都好積極嘅,做晒中西醫檢查,都話我哋好易有,但仲未有消息。(唔怕影響事業?)唔怕,我相信有自己嘅BB會係一個好難忘嘅經歷,好幸福嘅事。」

希望Jackson快啲有好消息話俾我哋知。(IG圖片)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。