【全民造星】姜濤立志做藝人　惹兄弟極力恥笑：咪普通男仔一個！

由ViuTV主辦的選秀節目《全民造星》已進入白熱化階段，昨晚（2/10）播出姜濤（姜B）的特輯。節目內，有提及到當姜B還是肥仔時的性格，還特別訪問了姜B的媽咪和好友，讓大家知道姜B鮮為人知的秘密！

姜B媽咪接受訪問時透露，姜B從小開始已經沉默寡言，可能因為肥胖影響了他的自信，所以就叫仔仔減肥。話雖如此，當姜B真係的起心肝減肥時，姜媽都直言見到仔仔因為唔食嘢而感到心痛，不過同時都很佩服仔仔的毅力。

姜B靚仔呢樣嘢，相信冇人會反對，但上天係公平，靚仔都有缺點。其實節目內都有提及過姜B經常遲到的問題，原來連姜媽都忍無可忍，更不留情面地在鏡頭面前教仔：「佢咁嘅性格，做任何事都慢吞吞，你真係要改改慢條斯理嘅性格，唔好遲到。咁樣會影響其他人，你唔尊重別人，人哋點解要等你？」

至於姜B的好友又點睇？中鋒及阿J是姜B打籃球時認識的好兄弟，兩人坦言姜B小時候很少說話，到長大後才在朋友面前放開自己。問到究竟姜B是否經常遲到？兩人即笑言：「係啊，講起就嬲！佢成日約打波、做Gym，約做咩都好，都係話喺佢樓下等，遲咗足足一個鐘。」更大爆姜B遲到的原因，是因為要貼雙眼皮貼和Gel頭！

而今日（3/10）《全民造星》最後十強與監製花姐現身鄭裕玲（Do姐）主持的電台節目《口水多過浪花》時，談到早前去了美國10天的旅程，肥仔再爆姜B超級姿整，還長期霸住廁所貼雙眼皮膠紙，就連排舞老師Travis Payne都問姜B是否去了廁所照鏡。不過出名錫姜B的花姐，就立即幫口話：「佢姿整係有原因嘅，咁佢以前係肥仔，怕唔見咗個靚樣，不過佢而家已經改咗喇！」

另外，雖然有很多人覺得姜濤靚仔，但他的好朋友並不覺得。當姜B跟好友表明立場要當明星時，好友的反應是恥笑他，全因並不覺得姜B靚仔，就連媽咪都打擊他：「真係唔覺得佢靚！」提到姜B曾指自己從未拍過拖，那姜B喜歡什麼類型的女生，好友們即搞笑謂：「通常都唔靚！」咁睇嚟姜B的要求不算太高，只希望對方單純及沒有機心，機會嚟喇各位女Fans！