【周遊東京2】炸物食極唔膩？ 周奕瑋私心推薦炸蠔筍店
周奕瑋（Jarvis）主持的旅遊節目《周遊東京2》又點少得帶觀眾食盡東京呢？昨晚播出的第二集，Jarvis就帶大家品嘗炸物，當中除了有一間店是Jarvis直言是今輯CP值最高外，Jarvis更私心推薦《香港01》讀者一間炸蠔專門店。
眾所周知，食天婦羅一定要新鮮熱辣先好食，但通常要食即叫即炸都唔會平得去邊。但Jarvis在節目推薦位於東京平民住宅區一條商店街內的天ぷら定食 まきの 武蔵小山店，師傅不單止在大家面前即叫即炸，而且價錢只係¥1090（約港幣75元），相當超值，Jarvis更表示：「我覺得係好抵同好正，因為嗰度大概有八件的天婦羅，有蝦、新鮮嘅魚同埋蔬菜，咩類型都有，個雞蛋仲好堅，一食會爆晒啲汁出嚟。師傅喺你面前即叫即炸，炸完即擺上枱俾你食，呢啲服務大家可能諗喺銀座一啲高級嘅地方先有，所以呢度CP值真係好高，所有食材都好新鮮，而且天婦羅師傅好用心去炸，你直頭睇見佢啲手指已經貼晒油穫，所以我個人認為呢間係今輯CP值最高的一間餐廳。」
天ぷら定食 まきの 武蔵小山店
地址：東京都品川区荏原3-8-5 1F
另外，東京第一炸豬排專門店亦是全日本炸豬排第二名。店舖除了選用精選豬肉，更加是現點現炸。
成蔵
地址：東京都新宿区高田馬場1-32-11 小澤ビル地下1F
另一間的炸雞專門店是持續7年拿下最高金獎，走過路過大家都唔好錯過！
元祖 中津からあげもり山学芸大学店
地址：東京都目黒区鷹番2-8-21 プロヴァンスG・U審美館 1F
至於Jarvis私心向《香港01》讀者推薦的是一間專食炸蠔專門店，位於人形町的三友。Jarvis更無奈表示：「我哋都好想做，不過因為蠔唔當造，拍攝嗰陣未有得食所以去唔到。」Jarvis更以拳頭來形容這間店的蠔：「呢間唔係平時嗰啲得一隻嘅炸蠔，佢係用好多隻蠔撈埋啲蛋汁一齊炸，由4隻至15隻不等。所以一咬落去，隻隻好甜，嗰種口感係好唔同，個size仲成個拳頭咁大而且價錢都好合理，冇記錯都係千幾円。」