【後生仔傾吓偈】馮盈盈用盡男友Quota：怕佢搵其他人做「運動」
撰文：鄺鈺瑩
出版：更新：
FYY原來都擔心寶寶會出去偷食，所以成日逼對方一齊做「運動」。（電視畫面）
最新一集《後生仔傾吓偈》以「熱戀期」為主題，眾人分別討論「熱戀期有咩特徵」、「熱戀期係幾長」等問題，馮盈盈（FYY）對於以上問題都十分之踴躍，更指「熱戀期夜晚好攰」，雖然佢有解釋係因為要傾電話，但相信心水清的觀眾都知道背後原因啦。
一講到運動，性博士即時精神晒。（電視畫面）
大家之後討論「熱戀期已過有咩特徵」，FYY毫不猶豫咁寫下「夜晚好空閒」，仲話呢個大家應該都好明白：「問題不僅是對手好得閒，或者佢唔係好想做運動，而係自己都冇個心做運動。」FYY回想自己熱戀期時，就算係普通運動都會準備好多「健身道具」或者盛裝出席，有時甚至有劇情咁去做運動。「之前仲會睇小說參考入面的情節，瑜伽招數都會使出。」瑜伽招數都用埋，唔怪得佢話熱戀期夜晚好攰啦。
寶寶「出現」喺《後生仔傾吓偈》次數極為頻密，原來佢有同FYY提議過片尾加特別鳴謝。（電視畫面）
之不過，到底點解會唔想做運動呢？FYY就話問題出自自己身上，因為當初佢同寶寶熱戀時，自己仲係學生，「冇做嘢夜晚就有好多精力去強身健體，逼到佢明明聽朝返工都要做運動。」FYY仲話之所以咁Chur其實係擔心寶寶會出去搵其他人做運動，所以想用晒對方啲Quota……最好笑係麥明詩聽完FYY運動論之後，問佢點解𠵱家又唔擔心寶寶會出去搵其他人運動，FYY竟然笑寶寶年紀漸長，同埋見識過佢工作環境之後，完全唔擔心，並表示：「總之我對佢有信心。」但麥明詩完全唔收口，更指Call房熄燈之後，做咩都得，激到FYY話錄影完之後就即刻返去做運動。
即場測試寶寶到底有幾關心FYY，答案都唔需要多講……寶寶今晚有難。（電視畫面）
其實喺節目上，FYY仲順應大家要求，即場以「我今日食藥時睇到單新聞，話何文田有塊地會拎出黎拍賣，唔知邊個發展商…… 」去測試寶寶到底會唔會關心佢點解要食藥，結果寶寶一如大家所料，只係回覆FYY地皮問題，激到FYY係咁話熱戀期已過。