【火速救兵】重演巴士撞騎樓意外 以真實救護員角度呈現人生無常

撰文:
最後更新日期:

由香港電台電視部和消防處聯手製作、以消防及救護員為題材的港台劇《火速救兵IV》已踏入第三個單元 ──「守破離」,講述由林文龍、梁雍婷飾演救護員的故事。上集(10日)講到一宗地鐵站火警救援事件,為求真實,劇組特意向港鐵租借黃大仙站作拍攝場地。《火速救兵IV》一向追求真實感,下集的播出的內容更加會上演一場巴士撞騎樓的重頭戲!除了使用真實巴士作為道具之外,就連拍攝手法亦以最貼近「救護員日常」的方式去呈現。

相關文章:

【火速救兵】力求真實港鐵站拍救人場面 導演:安排臨記走位最難

《火速救兵IV》第三個單元「守破離」,由林文龍和梁雍婷擔綱演出。

用真巴士做道具

在影視行業中,「無中生有」遠比「就地取材」容易,但為了提高真實感,導演范因明為完美演繹撞巴士意外的震撼場面,事前做足準備功夫,走訪香港街頭尋找合適地點,更找來一輛真的巴士:「第一,我係想架巴士似係撞咗落個騎樓,咁個騎樓要係啱高度先,高得滯低得滯都唔啱,第二,樓下要合理地可以有個巴士站,咁先至有咁多人企喺度,最後揀咗去火炭。我哋又喺劏車場搵咗架巴士,然後事先劏開佢,擺到啱啱好嗰個位,因為我唔可以真係撞埋去,如果撞爛咗個騎樓就大鑊。」

「我係想拍得出,去到現場第一眼見到架巴士開咗罐,俾人劏開咗,然後一地傷者嗰種震撼。」

以救護員的角度出發

大部分災難片都非常著重事件發生的前因,例如說明是人為疏忽,或者是因為無數個巧合而拼湊出意外,從而透過劇情鋪排和畫面讓事件的發生更能令觀眾產生共鳴。不過今次范導刻意避開這些劇情和場景,原因是希望以最貼近救護員的角度出發:「我故意將件事嘅前因後果淡化咗,冇講點樣發生,點解發生,完咗之後又係點,我特登唔講,因為救護員都唔會知道個起因係點,佢哋去到第一時係唔會理點解同點樣發生,唔會理係邊個啱邊個錯,唔會有任何批判,因為佢哋嘅重點係去救人,有人就救,呢個先係救護員真正嘅工作。」

「所以我就度咗一個鏡頭,我想撞巴士嗰下好震撼,係由望到覺得驚訝,然後我先慢慢拉去後面,咁我就用咗航拍,用航拍鏡頭跟住佢哋走,然後拉出嚟先見到架巴士,所以就利用咗一條走廊,穿過之後拉大見到架巴士。」導演范因明說。(受訪者提供)

梁雍婷拍攝中途受傷

雖然當日的拍攝是做足萬全準備,然而劇組千算萬算亦估計不到,拍攝當日遇上炎熱高溫,攝氏34.5度,而女主角梁雍婷更不敵炎熱發生意外受傷,她接受《香港01》時說:「因為當日太熱,加上全副裝備嘅緣故,又要跑落一條好長既斜路,點知體力透支,roll緊機嘅時候跑跑下仆咗喺度,我係成個人趴低咗,兩邊膝頭哥同手掌都腫咗同流血,要真嘅救護員幫我包紮。」梁雍婷不希望妨礙拍攝進度,所以負傷上陣都要完成拍攝。然而她最擔心的並非自己受傷的痛楚,反而是其他扮演傷者的演員:「佢哋要烈日當空,化住血流披面嘅妝喺度曬,我印象好深刻係有位飾演受重傷嘅婆婆,佢為咗保持個受傷個狀態,攤咗喺個地下好耐,我真係好感動,好多謝佢哋,冇咗佢哋,我哋根本完成唔到今次嘅拍攝。」

幸得林文龍即場教導,令梁雍婷能夠在受傷後仍能完成拍攝,她說:「文龍好好人,佢教我點樣可以令傷口快啲好返,同埋點樣可以跑得型啲又唔使跌倒。」(受訪者提供)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。