跨年綵排《短暫的婚姻》缺席《叱咤》？ 林海峰：而家煩緊呢樣嘢
由著名劇作家莊梅岩編寫劇本、方俊杰擔任導演的《短暫的婚姻》舞台劇版，將於下月（2019年1月）公演，劇中4位主角 ── 潘燦良、林海峰（Jan）、楊詩敏（蝦頭）以及禤思敏，今天（14／12）一同於新蒲崗綵排並接受傳媒訪問。問到今次跟「劇帝」（香港舞台劇獎最佳男主角）潘燦良首度合作感覺如何，阿Jan直言「失望」，「好可惜，對手戲真係太少，呢個編劇（莊梅岩）真係好『離譜』，我簡直『中招』！」
編劇莊梅岩拒為《短暫的婚姻》寫電影版劇本：我做唔到一雞幾味！
阿Jan驚訝：點解潘燦良可以咁「鬆」？
提到對於阿燦給自己感覺如何，阿Jan記起4年前和葛民輝演出三谷幸喜的舞台劇《笑の大學》（軟硬版，2014）後，有機會出席「香港舞台劇獎」的情境，「坐低之後我見到兩樣嘢，第一就係見到韋羅莎真人，佢喺我隔籬，之前冇睇過佢演出，但有睇過佢啲片；當時我見到佢同佢先生一啲好短嘅交流，再加埋佢上台嘅反應，我覺得同呢個人合作會係一件好好嘅事，結果後來真係有《搞大電影》（2017）。」
另一個就係見到阿燦。「又係冇睇過佢演出，但知道佢嘅大名，佢對我嚟講好深刻嘅印象就係，點解呢個人上到台上面可以咁『鬆』嘅？可能我誤解啦，其實佢係『迤』（Hea），哈！因為我係一個做任何工作，都會偏向好『緊』嘅人，（觀眾都覺得你好「鬆」呀）唔係啦，我呢啲係『假鬆』，我唔係睇佢演出，我只係睇佢領獎，就好奇點解佢可以咁『鬆』？你知我哋做慣《叱咤》，啲人上去領獎都係喊晒，好似死屋企人咁樣，所以見到阿燦咁，我就覺得，咦，如果能夠可以喺佢身上學習到，吸收到呢一種『鬆』，對我身體嚟講可能係有益嘅，點知冇幾耐就有人打嚟問我，有冇興趣做呢個劇！」
阿燦看罷《笑の大學》 強推阿蘇入場觀摩林海峰演出
至於潘燦良貴為本地劇場界的「大師兄」，早已身經百戰，很多人都覺得他對於任何演出皆遊刃有餘，然而知道今趟要跟林海峰合作，他也直言頗有壓力！「當年去睇佢演《笑の大學》嘅，真係睇一場，嘩一場，可能我哋呢啲慣咗有『職業病』，可能我平時見到佢係做棟篤笑呀，做司儀呀，或者係主持電台節目呀，你只係會見到佢自己（真實）一面，但我喺呢個劇真係睇到，佢好認真咁喺度搵緊嗰個角色，呢樣嘢係我冇預期，我真係被佢吸引咗！所以我好深印象，返去立即同阿蘇（蘇玉華）講，佢真係要搵張飛去睇，我覺得呢個演出係需要睇，我都吸收咗一啲嘢！」
游大東其他文章：
【回憶備份】衝出香港奪亞洲獎項 柯煒林：節目有質素總會被看見
《我和殭屍有個約會》變亞視神劇有段古 編劇陳十三爆無綫走寶：佢哋唔要！
【新加坡直擊】Netflix新劇講毒 戴高路拿：一劇不能代表墨西哥
【新加坡直擊】Netflix首辦亞洲高峰會 張孝全新劇30秒片花曝光
全民期待《叱咤》講兩句？ 阿Jan：今次好似係等古天樂喎！
提到《短暫的婚姻》將於2019年1月11日首演，意味4位主角將要跨年綵排，問可會影響阿Jan明年元旦檔期，不會亮相《叱咤》講兩句？阿Jan坦言相當煩惱：「你唔好問呢個問題喇，我而家日日都喺度煩緊呢啲嘢，（點解煩緊？冇時間寫講稿？）嘩，呢個係可以寫幾萬字嘅文章畀你喎大佬，好複雜㗎，但我睇下點樣簡單啲答你。首先你問，明年《叱咤》會唔會冇我份？呢個係充滿善意定係惡意嘅先？係想我唔喺度，定係話好想睇我？（相當善意呀，好多觀眾人都係等你出嚟嗰幕呀！）唔係喎，今次係等古天樂喎好似，（等你頒畀古天樂吓嘛？）即係我出嚟，就係古天樂出嚟嘅時候吓嘛？（你覺得佢拎獎機會大唔大？）拭目以待！」