【降魔的2.0】馬國明深夜咆哮製造噪音 街坊嬲爆頂唔順「還擊」
撰文:陳栢宇
出版:更新:
無綫(TVB)重頭劇《降魔的2.0》現在拍得如火如荼,由於劇情、角色牽涉妖魔鬼怪,所以大部分外景都需要在深夜拍攝。據知,日前劇集台前幕後在夜闌人靜的深水埗街頭拍攝時,因為一場咆哮鬧人戲,搞到附近街坊非常不滿,更有人打開窗戶向樓下的劇組大叫「靜一靜」。
飾演馬季的馬國明接受《香港01》訪問時,便解釋事件發生經過:「我嗌咗一兩聲,之後就有人叫『靜一靜』,喺上面嗌落嚟,之後我哋都冇再大聲,其實成場戲都係嗌一兩聲,騷擾到大家,真係唔好意思。」問曾否試過搞到街坊落樓當面話?他說:「咁又冇試過,通常有人叫我哋靜,我哋都會細聲,因為都唔想騷擾到大家作息。」
談到劇本要求深夜咆哮,但他卻周圍都是民居,馬國明就話有一個方法將影響減到最低:「我會揀位用力,即係唔會成段去晒,一定會就住,去到表達情緒個位先出力,既做到個效果,又唔影響人哋,始終套劇都係深夜嘅鬧市拍,都唔想影響到街坊,當然,如果係荒山野領拍就話唔使就。」
點擊下圖觀看馬國明型仔相:
+7
一般人認為深夜拍戲、拍劇,人少車少,理應較日光日白容易,但馬國明卻指一切都要視乎場口類型、拍攝地方而定:「有時有啲地方,好似街市附近,就算係夜晚都多人,我哋都要同街坊講,『唔好意思,麻煩靜一靜,我哋現場收音』,又或者如果去蘭桂坊拍,幾夜都有人,佢哋總會拎手機出嚟影相,有啲人仲要飲醉酒High High哋喺度嗌。當然,如果冇人冇車,深夜係方便過日頭。」