泳兒新歌首嘗新曲風 以「黑白」演繹MV:最大挑戰係跳舞

撰文:
最後更新日期:

泳兒於15日推出今年首支派台作品《明日花》,歌名與「明日黃花」相呼應,以「明日」的花來描述遐想的糾結。今次在編曲方面用了奇幻感較重的調子,將一個沉醉於單向戀愛的故事,鍍上一層撲朔迷離的虛幻感覺,這是泳兒首度嘗試的曲式。

泳兒收到歌後,第一時間便是上網搜尋「明日花」:「我理解為『你得唔到嘅嘢』,即係你以為聽日會見到一朵花,但其實朵花尋日已經開咗。無論點樣,你都唔會見到呢一樣嘢。」這首歌充滿幻想空間,泳兒說:「唔同嘅人聽到會有唔同睇法,可以係一首情歌,好似對住一個幻想緊嘅對象,好想得到你但又得唔到,幻想已經認定你,同歌詞『靈魂未相認 一早記得是你』相契合;另一個角度係雙面人,內外分別都有一個『你』,有啲人可能好驚會畀人見到內在嘅自己。」

泳兒找來合作多年的填詞人周耀輝為整個「花」系列擔任概念指導,同時負責之後歌曲的詞作。

《明日花》的MV也帶出上述概念,當中分別有一個白色、一個黑色的泳兒,代表着兩種不同的性格,「黑色嘅泳兒係潛藏喺裏面,有一啲訴求、有啲想得到嘅嘢,白色嘅泳兒就係相反。」除此之外,另一重點便是舞蹈,對泳兒來講頗有難度:「最大挑戰係跳舞,因為好耐都冇跳舞,仲要係跳contemporary嘅舞,每一個動作都要做得好靚,同埋加插咗一段要喺地上畫畫嘅舞蹈。其實大家都唔知道會係乜嘢效果,可能係一幅畫咗出嚟唔可以再repeat嘅圖畫,好代表呢隻歌,我自己都好鍾意呢隻歌嘅氣質,希望大家都會鍾意。」

周耀輝與泳兒決定以「花」作為主線,透露出泳兒心中想做但不敢做的事,可能也是很多人想做但不敢做的事,就如她的種種遐想。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。