【破壞之王】奔雷手角色夠經典 鄭家生:同星爺拍戲會不停NG

撰文:
最後更新日期:

無綫劇《鐵探》已進入結局篇,日前王君馨一場險被強姦的戲,就令觀眾睇得好緊張。劇中飾演強姦犯的鄭家生,更被網民認出當年於周星馳(星爺)電影《破壞之王》入面,飾演奔雷手文泰來一角。大家紛紛留言重提呢幕經典搞笑戲份,又話好掛住他在電影中的演出,至今依然令人難忘。幾乎所有睇過該電影的人都一定記得奔雷手文泰來呢一場戲,一講起這個名字,腦中就會呈現家生哥爆衫騷肌出雙拳的畫面。奔雷手文泰來其實是金庸著作《書劍恩仇錄》以及《飛狐外傳》裡的角色,是紅花會的四當家,原來將家生哥變成這個武林高手,是星爺親自度出來的主意。

鄭家生於《鐵探》中飾演一名強姦犯。(TVB電視截圖)

《香港01》電話訪問了家生哥有關他當年拍《破壞之王》有什麼有趣和難忘事,家生哥說:「當時呢場戲係星仔度嘅,佢即場諗出嚟。佢成日喺度諗要點樣拍,拍一個鏡頭可以拍一日,嗰場擂台戲我哋拍咗6、7日,每日都係等多過拍,等星仔佢諗嘢,諗好晒先拍。」他坦言事前完全不知道要爆衫演出:「唔知㗎,係星仔突然之間諗出嚟,話要我爆衫,咁咪即場爆衫囉,自己作為演員,導演叫做就做㗎喇,唔會反抗。(咁咪冇得事前操定肌先?) 無㗎,我原先都唔知要演出呢一幕,同埋我呢啲老鬼唔會操肌喇,而家啲後生就會。」

家生哥表示他爆衫這個short只拍了幾次就完成,因為星爺已跟武術指導度好晒才開始拍:「所有嘢都set好晒,件衫預先剪碎晒再搵線綁住,我一埋位就拍得,所以好快就拍完。」

周星馳當年於《破壞之王》入面嘅一場擂台戲。(youtube截圖)

談到星爺常被昔日合作過的拍檔指他好難相處,對此與他合作過多部電影的家生哥說:「我又唔覺得佢難相處,喺TVB咁多年,睇住佢由兒童節目出身到拍劇拍戲,同佢相處完全冇問題。佢係個人好怪,有時行過見到叫都唔睬,啲人會覺得佢好串,但其實係佢喺度諗緊嘢,諗到入晒神,投入咗佢自己個世界,根本唔為意到其他嘢,佢連行路都諗緊嘅。佢係一個好有要求嘅人,好堅持己見,所以同佢拍戲都會不停NG,一定要做到佢心目中想要嘅效果為止。」

家生哥於戲中飾演奔雷手文泰來。(youtube截圖)

以下就係家生哥喺《鐵探》嘅演出,仲有佢喺《破壞之王》飾演奔雷手文泰來爆衫騷肌嘅精彩鏡頭:

+7
+7
+7

大家除咗奔雷手之外,仲記得邊個《破壞之王》角色,不妨留言提出。



請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。