【婚姻合伙人】林秀怡公開減肥餐單食足一年 薯片零食都瘦到身?

撰文:
最後更新日期:

不少網民都十分欣賞劇中演員放開懷抱的演法,尤其是這一幕,更成為網民討論焦點。(電視截圖)

《婚姻合伙人》可說是監製潘嘉德在TVB的其中一套告別之作,首次擔正的男女主角楊明、高海寧亦十分有喜劇感,並沒令人失望。不過,此劇中最令人驚喜的,肯定是第二男女主角的陸永與林秀怡這對歡喜冤家。林秀怡接受《香港01》訪問時說:「呢套劇我應該唔係第二女主角,不過我有好多戲份就真嘅,真係要多謝德哥。同埋嗰時佢哋要搵個可以『醜得』又放得開嘅人,哈哈。佢哋嗰時畀我個指示係好似《撒嬌的女人最好命》入面嗰個謝依霖嗰種。」

最近的「鴛鴦戲水」一幕也十分惹笑。(電視截圖)

《婚姻合伙人》之後無其他劇承接會否失落?她回答說其實自己也有些許失落:「淨係一套劇播,然後就有人講下,之後就冇其他嘢。不過唔緊要啦,聽天由天啦,因為呢啲嘢都冇得話爭啲乜,人哋要搵你就係搵你。」除了演技出眾,另一個成就網上熱討就是劇中各種大膽演出。為了拍攝此劇,她更表示自己做足一年運動。「嗰一年成日同班朋友,得閒就跑步、打拳。每日就食雞肉、菜、芝士、糙米飯、蛋同豆漿。」

林秀怡向記者分享2015年時的健康飲食餐單。(受訪者提供)

林秀怡透露當時吃的,都離不開少食多餐、菜、雞肉。(受訪者提供)

林秀怡:「其實我未減肥成功㗎,哈哈。我諗體重就應該冇乜減到,不過明顯啲就係啲肌肉實咗。」除了以上餐單,她還提到一種特別的「零食減肥法」。「開始拍劇前嗰一個幾月,其實係因為日開夜開,然後我就戒飯,正餐少食但係就不斷食零食,薯片、糖嗰啲,但係我就冇好節食咁減,因為我太鍾意食嘢同埋個人會超級唔開心。嗰排就每樣嘢都食少少,但係就唔好食太多,就可以滿足到自己胃口,又唔使肥。同埋行路去到嘅就唔搭車,因為行路都可以當運動。」

拍劇開始前,林秀怡過了一年的減肥而又健康的生活。(IG圖片 / kirbysau)

「其實我之前都Keep住喺105-110磅左右好多年,唔知點解之後到上年年中就開始不斷咁肥,而家就開始再減返,我真係飲水都肥嗰種。之前就食極都冇乜嘢,可能係因為慣咗唔食飯、盡量揀少澱粉質食物。不過而家真係肥咗好多,哈哈,真係同個瘦字好難扯得上關係,好慘!」見到別人大魚大肉會否羨慕?「冇乜嘢㗎,因為我都可以食㗎嘛,不過就唔係成碟啪之嘛,可能係一兩啖咁食。」

林秀怡表示自己最近又要再開始減肥。(資料圖片)

不少人都讚《婚姻合伙人》中的林秀怡十分之Fit。(電視截圖)

+2


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。