【好日子.多圖】「少女陳煒」被網友嫌醜 吳嘉儀自爆有諗過整容

撰文:
最後更新日期:

陳煒、黃智賢和張達倫主演的無綫新劇《好日子》正於翡翠台播出,劇情上星期便重組「卞慧晶」陳煒當年被侵犯的真相,原來施以毒手的是「齊萬碩」張達倫!不少觀眾都覺得這部份頗有追看性,又大讚飾演少女版陳煒的吳嘉儀(阿七)相當搶眼,幾乎80%出場時間都喊到癲,似是無時無刻都能夠從眼角咇出勁大滴眼淚。

堅持不用眼藥水扮喊

阿七接受《香港01》訪問時便指當初接劇本時已經嚇一嚇:「試過拍咗大半日外景喊戲,再返TVB接廠,食飯嗰陣直頭發吽哣,好彩有敖嘉年前輩幫我做心理輔導。」堅持不用眼藥水當眼淚的她,更指當時是靠回憶往日拍拖的傷心事逼自己喊:「最記得係拍之前劇組勒令我減磅,因為始終演女神煒哥嘅少女時代。(減咗幾多磅?)唔算多,5磅左右,最主要都係令塊面冇咁脹,少啲Baby Fat。」

吳嘉儀在《好日子》裏面是名副其實的大喊包,幾乎八成時間臉上都排上淚珠,好考功夫。(《好日子》畫面)

點擊下圖觀看阿七在《好日子》亮相的畫面:

+2

《八時入席》上位後無以為繼 感謝綜藝監製何小慧

提到阿七之前憑處境喜劇《愛.回家之八時入席》(2016)「嘉莉」一角入屋,令當時入行只有一年的她成為無綫最幸運新人之一,但之後兩、三年卻好像無以為繼,接到的大多都是發揮空間不大的閒角,她坦言:「做完《愛.回家》後一個月好灰,曾經質疑過自己啱唔啱做電視演員,因為試過主動敲門搵嘢做,佢哋都係答『你做嘉莉入咗觀眾個腦度,冇咁快可以畀你演角色住』。」

所以阿七非常感謝綜藝科監製何小慧讓她在搞笑節目《最緊要好玩》演出,令她重拾自信:「之後又遇到十仔(吳冠宇)、德哥(潘嘉德)、小青姐(梅小青)等伯樂。其實初初我屋企人都以為我燉冬菇,因為近期播嘅劇都係訓練班初期拍,有發揮嘅一套都未播。」她又感謝經理人好照顧她:「佢不斷安排啲小品廣告同埋司儀畀我做。(都有萬幾、兩萬蚊收入?)差唔多啦!」

吳嘉儀在《愛.回家之八時入席》中飾演撰稿員「嘉莉」,與「Terry」李偉健有感情線。(《愛.回家之八時入席》畫面)

整容不整容 That's the question!

的確,比起很多同樣在演藝學院的同學,阿七的收入、工作量都比較穩定,但面對的壓力也比其他同學多:「做藝人要接受好多唔同嘅批評,如果係講演技我好接受,因為要吸收唔同意見先會進步,但其實好多時都係話我樣衰、肥,咁我都知公司好多靚女,相比之下我梗係做丑角啦,我自己都想做類似角色,但始終要等機會。」

會否跟風整容?阿七笑說:「入行前都曾經同姊妹講笑咁傾過可以整邊部份,但好難淨係整一Part,鼻太高又唔似香港人,對眼黐埋啲又似E.T.,整晒就驚朋友唔認得,同埋而家網絡咁發達,隨時俾人搵返啲舊相,到時瘀到爆。」她坦言最不滿意是自己的腿長:「整長啲就最好,因為腳長着咩都靚!(但你不時都貼水着相喎!)見呢排Fit返少少,多謝Fans鼓勵,同埋男朋友咁大方!」

點擊下圖觀看阿七Instagram靚相(內含水着照):

+25
+24
+23


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。