張敬軒扮「火龍果」被稱「腳毛女神」:早啲做代言人就唔會搞成咁

撰文:
最後更新日期:

張敬軒打破女藝人拍攝女性脫毛廣告定律,擔任新一任代言人,並與龔慈恩囡囡林愷鈴合作為品牌拍攝微電影《看得見的完美》。為女性脫毛品牌代言,軒仔認為箇中原因是:「可能我平時審美眼光俾人感覺夠挑剔,所以『完美』兩個字應該同我好近,想啟發唔同嘅女仔知道『完美』應該係點,我諗我係個幾唔錯嘅儀容顧問。 」

張敬軒與林愷鈴合作為品牌拍攝微電影《看得見的完美》。

於去年舉行《HinSIDEOUT》演唱會的軒仔,因為要扮「降2度」著熱褲勁歌熱舞,每日開show 前都要悉心處理一對「飛毛腿」,但早前軒仔化身新人「火龍果」,惡搞容祖兒的《Pretty Crazy》變成《Pretty Hungry》,一雙毛腿加「打格海膽」成為焦點,更被冠以「腳毛女神」,軒仔笑言:「如果早啲識做代言人就唔會搞成咁啦,不過我覺得儀容整潔係好重要,尤其女仔,如果處理得唔好,就會俾人有唔整潔嘅感覺。」

張敬軒在微電影中是完美主義者,常常黑面。

在微電影中,軒仔扮演著名形象設計顧問,與剛畢業同樣是設計師的妹妹林愷鈴,因大家都是「完美」主義者而令工作經常產生磨擦。軒仔坦言,因為要飾演事事嚴謹的哥哥,故戲內大部份時間都要黑口黑面兼毒舌,現場拍攝時心情更要保持沉默:「無論做咩角色,都需要好多energy,尤其呢類歇斯底里角色。其實我同戲裡面最相似嘅地方,係對每件事都好有我嘅堅持同執著,同對我嘅音樂一樣,會看重每個細節都想完美。人成熟咗,反而學識抽身用多個角度去睇每件事。」

雖然軒仔無論戲內戲外都要黑口黑面,但在NG片段中,見到他忘記對白,總忍不住放聲大笑,緩和現場的沉重氣氛,也難怪被「哥哥」不停鬧的林愷鈴,坦言被軒仔鬧得好開心:「自己都好鍾意音樂,一直有留意軒仔嘅作品,可以同佢合作真係好開心,當然希望將來有機會唱到佢嘅作品啦!」林愷鈴稱收到微電影劇本後,有問媽咪龔慈恩意見,她說:「我都有同媽咪分享今次嘅工作,問佢攞啲意見,但媽咪俾我好大自由度,會好放手俾我用自己嘅方法去演繹。其實我覺得自己同角色性格有啲似,都有硬頸嘅一面,但正如微電影裡面嘅故事,無論兩兄妹點鬧交,彼此都係咁愛大家,係一份好可貴嘅感情。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。