【包青天.專訪】TVB製作被看輕 胡定欣談主因:我哋要檢討自己

撰文:
最後更新日期:

年多前,胡定欣一拍完無綫(TVB)劇集《包青天再起風雲》,便開始放了自己一個悠長假期,到現在劇集剛剛播完,這個「大假」卻未有完結的跡象,至少她現在仍未有任何新劇拍攝,加上她近年開始在電影界插旗,令「胡定欣早已離巢」傳聞不逕而走。「我仲有合約嘅」,胡定欣笑認這則假消息正合天時地利人和,「堅」到連身邊好友都信以為真:「我只不過係休息啫,點知『被離開』!同埋我真係冇限定自己喺邊個範疇做邊樣嘢,有機會、有能力就應該要試下。」所以除了重拾生活,她也試了從前不敢試的事物,登台開音樂會、參演舞台劇,為自己發掘出另一個「胡定欣」。

胡定欣在《包青天再起風雲》中飾演女訟師「雲千羽」,性格耿直剛烈,富正義感,後來更發現自己的真正身份是大宋公主。她笑稱這個角色是近年演得太舒服的一個:「個角色唔需要轉彎抹角,唔需要去懷疑,冇呢啲多餘嘅思想。以往我做皇后,係需要有啲心計,去策謀一啲嘢,或者係用啲手段去得到你想要嘅嘢。又或者做打女咁,需要好多技巧、體力。」(TVB《包青天再起風雲》劇照)

點擊下圖觀看更多《包青天再起風雲》劇照:

+4
+3
+2

TVB忠臣不外闖 已非追獎項階段

說真的,不少人覺得胡定欣已經沒有任何理由留在TVB。飛躍、女配,她拿過;視后,她更拿過兩次;角色,大唐皇后、強悍女將都演過;名氣,家中有電視都會認識她;錢,向外闖似乎搵得更多,斷估她並非劍指「萬千光輝演藝人大獎」……不少後輩未達到她的高度已經急不及待離巢打天下,但她沒有這樣做,所以外界一早已經封她「忠臣」。

那麼,胡定欣在追求什麼?「我而家追求嘅係能力,自己表現、演出上嘅能力,再唔係追求獎項,我覺得我過咗嗰個階段。」就像之前在舞台劇演出,都是挑戰自己能力。她以前深信自己沒法在零NG的情況下強記一大串台詞:「你唔試永遠唔知自己做唔到,雖然唔稱得上好專業,但係至少我試咗。」

胡定欣連續在2015年和2016年的《萬千星輝頒獎典禮》中獲得「最佳女主角」,與「阿姐」汪明荃、鄧萃雯和余詩曼並列奪得最多次視后的演員,不少人都好期望她再拎多次獎,成為香港首位三屆視后。(資料圖片)

為情意結留TVB:我希望呢個平台好

如果是追求更高境的演技,TVB一定不是唯一場所。胡定欣之所以選擇留在這間電視台,好明顯是一份情意結:「呢十幾年嚟,我嘅Base都係TVB,呢度係我嘅成長、學習、累積得到好多嘢嘅地方。大家對我嘅認識,都係源自呢一度。」

不過,TVB如今已非當年觀眾眼中輝煌,甚至有人「唔睇TVB為榮」,直斥這間電視台專拍「膠劇」。談到這種風氣,胡定欣神情不免凝重起來:「我得到嘅嘢都係呢個平台而起,我當然希望呢個平台好,希望呢個平台繼續源源不絕、有唔同創新,因為佢都係陪住我哋香港人成長嘅一個平台。其實每個同事都好希望盡自己能力令件事好,大家都好珍惜個平台,但呢個唔係靠一個人嘅能力做到,要大家一齊去做先得。」

除了在TVB拍攝劇集,胡定欣最近亦成為電影演員,2018年上映的港產片《逆流大叔》便是她的處女作,完全搣甩電視味的她更憑角色「Carol」楊敏琪得到金像獎「最佳新演員」提名,備受肯定。(電影《逆流大叔》劇照)

觀眾有比較 盡力做最好

至於TVB製作總被看輕,胡定欣認為主因是觀眾的眼界比起昔日廣闊得多,令本地製作直接與外地有比較:「所以我哋要檢討自己有咩不足,嗰種能力差距有幾遠,係唔係做唔到,應該點做,呢啲問題真係要檢視一下。」談到本地影視業最大問題,她不期然輕嘆一口氣,指出一間公司、一個行業要顧及、要審視的種種問題,並非一個演員可以解決到:「佢哋都有一班要照顧嘅觀眾層,但係我相信佢哋已經不斷嘗試緊新嘢,突破自己嘅可能。」而她作為其中一部份,亦會盡力做到最好。

服裝:Lane Crawford、Stuart Weitzman(鞋子)  
造型:Queenie Yu
髮型:Matt Chiu @ Xenter 
化妝:Cyrus Lee
場地:香港九龍貝爾特酒店

提到感情生活,胡定欣笑稱當初放大假確有識男仔的打算,但始終未遇到如意郎君:「你估我今日入紙申請放假,聽日就有男朋友咩,係咁易就好。」她又指擇偶條件只有一項:「心靈上要溝通到,我諗每個階段要求嘅嘢都唔同,個人亦都成長咗,都拍過唔少次拖啦,大概都知點樣先至Click到。」(陳順禎攝)

+2


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。