雪兒與Chris Collins「肉搏」巴西柔術有板有眼 願嘗試動作電影

撰文:
最後更新日期:

長居新加坡的雪兒(Michelle)一向非常注重健康,除了跑步、學泰拳外,最近還挑戰巴西柔術,趁來港工作的空檔,找好友兼電影動作指導Chris Collins練習:「因為自己係女仔,所以想學少少自我防禦技巧。」

Michelle先與假人練習多個不同的防禦動作,之後與Chris Collins「肉搏」,期間她更不時將對方鎖在地上,成功制服Chris Collins。其後Michelle再練習另一套防禦動作,先被Chris Collins從後「拑實」,不過不消一會她便成功「逃脫」,再反客為主用雙手鎖著對方條頸。

Michelle與好友兼電影動作指導Chris Collins練習防禦術。

雖然練習得有板有眼,但Michelle坦言不太習慣與對手「肉搏」,她表示︰「其實我唔係太習慣同另一個人咁Close,但我朋友好鍾意巴西柔術,玩得好叻,就叫我喺新加坡一齊上堂。」她又指學習巴西柔術讓她保持年輕︰「學呢啲動作可以運用我嘅腦袋,對我嚟講係新嘢,令我心態保持年輕,因為我要諗同吸收先可以做到呢套動作。」

Michelle指學習巴西柔術有助於自己保持年輕。

予人感覺弱質纖纖的Michelle笑言平時上堂練習時,對手都特別照顧她︰「通常我上堂,大家都好小心,因為知我好易受傷,而且因為受傷令我工作唔方便,所以大家都好錫住我。」

她又指自己曾試過打到周身瘀︰「有時唔小心手臂同腳都會打到瘀,因為要喺地上練習,塊面都會整到,兩邊臉都試過瘀,不過唔係咁嚴重。」會否嘗試做動作演員?她說︰「其實好大挑戰,但自己想試,之後如果有電影需要,我都可以郁少少,拍少少動作嘅電影,如果有時間讓我預備去練一套動作,我覺得都會做到嘅。」

Michelle有意參演動作電影。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。