與陳百祥舌戰後受訪 杜汶澤勁火滾斥對方冇邏輯:嘥X氣!

撰文:葉詩
出版:更新:

對社會議題抱截然不同意見的藝人杜汶澤與陳百祥(阿叻),今日(5日)在港台直播節目《視點31》討論近月對各社會議題的看法。在節目結束後,二人接受傳媒訪問,杜汶澤談到是次答應出席對談是因為記者利君雅,可惜今天無緣與她見面;杜汶澤直言沒看過陳百祥之前的訪問:「人同人嗌交都要有基本嘢先可以拗,而佢最可怕嘅地方係唔記得自己講過乜,完全冇邏輯可言。(會覺得他無賴?)無賴就固之然,所以我而家明白點解佢一路都係咁。冇辦法,佢咁嘅年紀有咩責任教識佢?」杜汶澤自言很是激氣,而說到用一個形容詞形容阿叻,他就答:「嘥X氣!」又說要打邊爐下火。

杜汶澤與陳百祥今日在直播節目討論近日對各社會議題的看法。(Facebook/@香港電台視像新聞)

陳百祥甫出場就說聽到杜汶澤的想法:「但我唔Buy佢嘅諗法。」他又堅稱自己看到10月1日警察的生命受到威脅才決定開鎗:「我冇分藍黃,我係講自己點諗,我由頭到尾都話和平示威,或者唔滿意政府嘅可以遊行,說服到我的話我都去嘅!問題係我唔鍾意暴力,兩邊嘅暴力都唔好,如果警察用過分暴力都唔好,但我睇唔到警察用過分暴力!」

陳百祥認為節目直播的話要對自己說過的話負責,若然是錄影會擔心節目組的剪輯。(葉志明攝)

談到有大學生在停車場疑為躲避催淚彈意外墮下,陳百祥說:「呢個係一個悲劇,我係會可憐呢個學生為理想付出生命,我上嚟就係希望佢哋聽到我講嘢,唔好白白犧牲。佢哋追求緊嘅嘢百分之九十係追求唔到,點會有人犯咗事係冇事?我最痛心佢哋咁樣諗!」他聲稱自己五分鐘前才看到這段兩天前的新聞。他又自言經常在演講時面對年輕一代:「但我而家真係唔了解佢哋嘅諗法,因為我冇細路、唔識教育,我唔係出嚟做英雄,我只係想香港安居樂業。我出嚟明係做箭把俾人鬧,但我犧牲少少有乜所謂?」

港台門外有市民高呼「光復香港」等口號,亦有市民表示支持叻哥成為警務署處長。(葉志明攝)
+1

陳百祥又自言自己一直都聽到與自己相反立場的聲音:「我覺得嗰啲聲音係錯!我睇到畫面、新聞啲教授點樣教佢哋(年輕人)出嚟犧牲。」談到不少街坊被警察武力(如催淚彈)波及,他說:「杜汶澤話而家香港係內亂,你仲出去睇熱鬧做咩?」他又表示支持獨立調查委員會:「不過要件事完咗!」記者指有行家被鐵鏈鎖着拘捕,他就說:「我唔評論個別事件!唔關我事!嗰啲畫面我睇唔到!(選擇性接收資訊?)我唔係揀,我唔會24小時望住新聞啩?」及後阿叻在記者一片追問聲下離去。

你可能感興趣