錢嘉樂堅持真實動作拍攝 連張家輝古天樂都好難接受

撰文:吳子生
出版:更新:

回顧香港70至90初期,港產動作電影大行其道,出產過無數功夫英雄及警匪槍戰電影,電影產業成績輝煌,可以話正值黃金年代。不過隨著科技發展及社會不斷進步,大部份爆破飛車特技場面,後期都由電腦CG特效製作,所以大多演員對舊式拍攝手法拳拳到肉打鬥場面有微言,錢嘉樂慨嘆:「用後期製作出嚟嘅效果,咁呢啲只係一個演員,實實在在做出嚟嘅,先係武打巨星。」

錢嘉樂感謝香港政府支持香港電影業,明白到香港地少人多,在審批場地需時,希望政府能夠將審批時間縮至三月時間,遷就香港電影公司運作模式。(葉志明攝)

演員質疑實拍特技動作場面雙方差點反目


縱橫影藝圈超過三十年,現任《香港動作特技演員公會》會長兼武術指導的錢嘉樂,初入行時為港產片龍虎舞獅(洪家班),對於港產動作電影如今非昔比,嘉樂仔有一番感受:「其實大家如果有留意到我拍嘅電影,我都要求實拍嘅,好多演員就因為咁差啲同我反面,佢哋會質疑我宜家仲要咁拍,我就會解釋畀佢哋聽,點解我哋會出咗個國際巨星李小龍同成龍,正因為佢兩個都係真真實實咁做出嚟,先成為巨星。如果係畫出嚟又或者用後期製作嘅話,咁呢啲係一個演員,呢啲人大有人在,而我哋正正做緊呢樣嘢。」

錢嘉樂表示80年代香港特技人揚威國際 連荷里活都聞風喪膽話呢班人傻。(葉志明攝)

曾與兩大影帝張家輝古天樂合作有爭拗


嘉樂提到當年為電影《使徒行者》擔任動作導演時,曾與兩位影帝級人馬張家輝和古天樂因拍攝動作特技時有拗撬,有感而發話:「我最貼身嘅感受就係,當你要說服一個演員,再去同你用返80年代嘅方式去拍,佢哋好難接受,以前我就真係拍唔少喇,試過喺8樓咁高跳落去,被幾個汽油彈炸過都試過,以前係實實在在做出嚟,所以香港特技人連荷里活嗰邊都會覺得驚,心諗呢班人傻㗎,所以當時我哋係闖出名堂,咁所以我好想保留呢啲嘢,但我又唔可以不擇手段去迫佢哋去做,但我有同佢哋兩個解釋拍出嚟效果好嗰個唔係我,係你哋兩個。」

錢嘉樂為《使徒行者》擔任動作導演,在拍攝現場指揮。(無綫電視畫面截圖)
嘉樂認為要說服演員實景拍攝特技,難過登天。(葉志明攝)

打得出色觀眾加分  慨嘆演員不領情 


嘉樂續說:「好似電影《東方不敗》林青霞和《皇家師姐》楊紫瓊,好記得當年睇完《皇家師姐》午夜場出到嚟啲觀眾就話條女真係幾好揪喎,但《東方不敗》林青霞更好揪就係,手指一彈熄支蠟燭,幾十人就死係面前,但人哋唔會話林青霞好揪,只係話程小東拍得勁,我話你想我攞呢個分?定係想呢啲畫面出到嚟之後,你哋啲演員攞分?點解我咁辛苦咁拍,要你哋自己嚟一個,係因為最後個畫面係你自己嘅角色張家輝演員攞分。」

錢嘉樂大讚林青霞在電影《笑傲江湖II東方不敗》中演技精湛。(影片截圖)
錢嘉樂大讚電影《皇家師姐》中楊紫瓊好打得。(影片截圖)

盼港府縮申請場地時間表  配港影業發展


要促成港產動作特技電影重生,除要靠一眾演員之外,還要香港特區政府配合批出場地供拍攝,但嘉樂直指現有政策下批出場地需時過長,令很多電影投資方卻步,形成一個重大障礙:「其實自從我做咗會長之後,都有同政府相關部門開會傾過呢個問題,初頭我唔了解外國製片嚟到香港拍嘢可以咁樣封路,而我哋就唔得,咁原來外國片佢哋差不多九個月至一年之前經已申請,咁我哋就反映番香港製作唔可能一年前已經養呢班人,係冇可能埋到班嗰啲製作費,希望佢哋可以縮短審批時間至三個月,配合番我哋香港電影公司會做嘅嘢,咁所以佢哋明白宜家慢慢微調去遷就。」

嘉樂希望能夠在有生之年,將80年代港產片獨有的動作特技電影重振聲威。(葉志明攝)
+3