【晚吹】連登巴絲現身 教銀髮族解讀用語:佢哋用返其實好開心

撰文:鄺鈺瑩
出版:更新:
幾位連登巴絲都話自己嘅身份好保密。

娛樂圈年度「最Sweet新聞」名單有喇!即到《01最賞睇娛樂大獎》投票,仲可以參加勁抽雙重獎,隨時贏得終極大獎旗艦手機11 Pro Max、Dyson風筒等。

最新一集《晚吹- 又要威又要戴頭盔》搵嚟四位連登巴絲做嘉賓,佢哋分別係晴天林、乖孫、在沉默中爆發以及Edison。乖孫透露成為連登用戶兩年多,近月開始喺studio教一班銀髮族使用連登。「佢哋最唔明係連登用語,例如係『大大力錫佢xx』、『DxxM』、『李慧瓊子 』,但講解完咩係DxxM後,而佢哋用得返其實都好開心。」乖孫又指教學時,會同時配合《【突發】跪求夢中乖孫》一書,成效更快。對於乖孫所講嘅用語,主持林二汶聽得既開心又新奇,相信佢都好需要一本《【突發】跪求夢中乖孫》。除了教用語之外,乖孫透露銀髮族使用手機APPS睇連登時,一開始由於唔習慣,所以會以標題當作為內文,「佢哋以為係九唔搭八嘅嘢,要教佢哋按入去睇。」

林二汶今集又長知識啦。

曾經有唔少人都認為連登仔又毒又宅,但「在沉默中爆發」表示自社會運動後,大家都開始認真對待連登,並指「每次運動後都開PO檢討,如果係廢青,點會想進步?」又謂「 我見到係有啲有車有樓或者做銀行,係未咁廢青?我又唔係咁睇。連登其實係一個小香港,咩人都有,可能真係有廢青,但有啲醫療、法律PO,真係有律師出來回應。」

銀髮族對連登PO有時都會提出疑問,「乖孫」會鼓勵佢哋多睇幾個PO同埋點FC。

提到近來大家都好關心嘅FACT CHECK,「在沉默中爆發」認為確係有一定難度。「唔好用感性一面去接收資訊,用自己立場去代入會影響判斷,要理解前因後果,用不同渠道搵出真相,就好似之前流傳一份831名單,中有死者住天水圍某單位,最後係我自己去查,發現原來無呢呢個室,咁就知係假。」