《仍堅持》的士佬入行37年主角變綠葉 邵卓堯:只欠一個機會!

撰文:
最後更新日期:

鄭世豪新歌MV《仍堅持》找來邵卓堯當主角,但原來邵卓堯本身的故事亦甚為吸引。

邵卓堯當時在無綫薪水一萬都不夠,為了愛女學業,兼職的士司機,認真是好爸爸。

鄭世豪新歌《仍堅持》MV,向一眾默默耕耘的無綫綠葉致敬,以的士司機邵卓堯帶出整個故事,現實中這位入行37年,又在無綫做了27年的藝員,真的當過8年的士司機幫補生計,他說:「嗰陣個女啱啱出世,一份人工不多,又撞正03年SARS,公司又發生裁員,我哋亦要減薪。嗰陣如果不『爆騷』,一個月一萬蚊都冇,所以電視台冇工開就揸的士囉,初時都有少少尷尬,好多時都有人認得,『咦!…你咪係做戲嗰個?』但之後傾傾下,佢哋都明白,我係演員唔係明星,你見劉德華揸的士就話奇怪啫,啲乘客都好㗎,有時我唔識路,佢哋都話兼職唔識無所謂啦。」

除了生活,卓堯最主要想女兒有更好的學習環境,他說:「廣告都話養一個小朋友要400萬啦,書簿費、興趣班,樣樣都係錢,我又想發掘下佢嘅興趣,咁咪做夜更的士佬囉,個女當時都唔知架,只係知我做演員,佢大嗰咗先知,唔覺得辛苦喎,做父母梗係盡量俾最好嘅自己仔女啦。」

21歲的邵卓堯當過邵氏電影小生,拍大陸電影《小毛孩奪寶奇緣》,當時大陸電影市場不像現在,基本沒有人看。

54歲邵卓堯好多人認得,但不多人叫得出名,原來後生時曾經是邵氏電影小生,更做過電影男主角,他說:「19歲讀邵氏藝員訓練班,同期有郭政鴻、區瑞偉,21歲好好彩拍咗套電影《小毛孩奪寶奇緣》,咁票房當然係唔得啦,以前大陸戲邊有人睇㗎,之後仲轉咗行做地產,但89年嗰陣地產又死,撞啱無綫又有訓練班咪去囉。」

拒簽月薪4000元合約消失樂壇 麥貝夷:不能不攞錢回家

「認字特警」李天翔爆不續約無綫原因:等了20年 不想坐以待斃

 

2010年邵卓堯終於等到一個有發揮的角色,在《刑警》飾演殘障殺手。

89年入無綫,邵卓堯由電影小生變為電視綠葉,戲份少,有時甚至演路人甲,但他性格豁達,好快已衝破心理障礙,他說:「初時有少少唔開心啦,但後尾都知小生呢啲30歲前,有就有,冇就冇,冇得強求,我好快都知要向實力派進發,冇亂諗喇。」在無綫27年,邵卓堯同好多綠葉一樣,有得做,但戲份機會不多,難得他表示團火沒有熄過,他說:「你話有冇hea?好老實有時真係有,但好少,譬如拍拍群戲,你係其中一位,大家都知咩事,嚟執騷啫,大家開心就算,但一有戲做,我一定會捉到實,TVB其實好多我呢類演員,做咗好多年,一定係好鍾意做戲先留喺到,我哋只係爭一個機會,一個角色,呢個機會唔係要做主角,而係一個角色,就算只係得幾場戲,我哋都會全力去演,因為有戲做嘅機會真係好少,一有我哋實搏哂命。」

結果邵卓堯在2010年《刑警》等到一個好角色發揮,其中一個單元三集戲,飾演殘障露宿者,他說:「好多謝當時導演,即係依家嘅《使徒行者》電影導演文偉鴻,佢俾呢個機會,自己做完嗰角色,嗰份滿足感,係其他行業好似揸的士、做地產都俾唔到你,咁少戲份都滿足?戲多戲少冇所謂,最重要係有得做。」

邵卓堯、區瑞偉、郭政鴻,三位在邵氏電影訓媡班已認識,對於區瑞偉在《城寨英雄》彈起,非常高興。

邵卓堯早前在《Sunday靚聲王》獲頒《壞蛋王》表揚他多飾演奸角,但他絕不介意,他說:「做演員最緊要有人認得,如果做壞人,有人諗起自己,咁就証明成功啦,做幾廿年都俾人印象模糊先係失敗,個女成日都講笑話老豆你又做壞人呀?我話係呀,其實佢都明白嘅。」

區瑞偉在《城寨英雄》彈起,和他是同期兼好友的邵卓堯,不但沒有眼紅,反而替他高興,他說:「佢為咗呢個角色1個月減十幾磅呀,瑞偉都等咗好多年,佢值得㗎,駛乜眼紅人呢?話唔定下個機會係自己呢?每年都有人上位,如果成日諗點解唔係自己上位,咁你咪好辛苦?我哋呢啲有時要當演員係份工,唔好set太高目標,亦唔好計較得失,唔駛一定要自己去到幾多綫明星,被人認同你係專業演員,對我嚟講已經好足夠,開工唔好hea,認真去做,一定有人睇到。」



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。