【降魔的2.0】傳麥凱程因示威遭TVB雪藏 馬國明:我連佢電話都冇

撰文:陳芷穎
出版:更新:

馬國明今日(14/5)現身將軍澳電視城出席TVB劇集《降魔的2.0》宣傳活動,昨晚播出的一集中講到馬明重遇生命中最重要的人,一幕幕感人畫面令觀眾睇到眼濕濕,馬明指要開廠未有時間重溫:「我自己未睇,但拍嘅時候個感覺好正,遇返好多第一輯嘅人,可以令觀眾有返回憶。之前虐兒嗰單case好多觀眾鍾意,嚟緊有好多touching嘅故仔。」

馬國明出席TVB劇集《降魔的2.0》宣傳活動。(梁碧玲攝)

劇中,馬明的角色非常「麻甩」,不但有除褲鏡頭,仲有金句「左青龍右滑鼠」,拍攝時馬明未感尷尬,仲有做返自己的感覺:「拍嘅時候我打晒底,好多朋友同我講返呢句,我跟劇本讀,好好笑好抵死。做小馬好舒服,又唔使顧樣、顧頭,好貼地嘅的士佬,唔使點化妝就埋位。(做返自己?)都係,小馬有啲嘢幾似我,但我未至於着短褲出街,喺屋企唔會着孖煙通。」

+1

有傳同劇演員麥凱程在反修例活動中被捕,繼而被TVB雪藏,麥凱程今日亦未有現身《降魔的2.0》宣傳活動,馬明指與對方不熟悉:「我同佢唔係好熟,同佢唔係好多戲,之前又未合作過,唔係好認識,我唔理人哋私人嘢。(知唔知對方近況?)我真係唔知,我連佢電話都冇,記者講我先知。」