【致命復活】譚凱琪鵪鶉妹扮自信 裸背挑戰自我:幾大都要做落去

撰文:
最後更新日期:

最近睇《致命復活》就好似玩無獎競猜遊戲,觀眾紛紛偵探上身,不斷估誰人就是害郭晉安被綁架的幕後黑手。不過有一日,忽然有人講了句:「《致命復活》個Emma都幾乞人憎!」終於為此劇帶來新話題。譚凱琪(Zoie)飾演的Emma,是個十優狀元,滿身就是硬道理,說話倔強,如果要跟這類人相處,的確並非人人接受到,繼而敬而遠之,所以天秤座的Zoie都話演起上來有難度。

攝影:黃國立

服裝:Imperial from MAGinSHOP

根據普遍的星座書都指天秤座為人比較優柔寡斷、溫和,Zoie對此都深表認同,還擔心劇集出街,見到Emma如此強悍,會被觀眾丟雞蛋:「一直以來都做開比較柔弱的角色,相對容易handle。加上我平時說話都比較慢,又多尾音,而且又冇咩自信;但Emma就好tough,講嘢好sharp,所以都幾大分別。係幾難做㗎,但後來慣咗個節奏,都feel到自己睇見浩信佢哋有啲唔順眼!」觀眾丟雞蛋就未必了,但從友人一句「Emma好乞人憎」,Zoie都好成功,建立了一道Emma的專屬氣場。

中Emma又有氣場又倔強,與Zoie性格完全相反。

裸背當盬花點綴下

不過,Emma又不只得硬朗,就好似早前已播出的被人整蠱和裸背情節,還為沉重劇情帶來了少少鹽花點綴下,是一個輕鬆位。短短幾分鐘的畫面,Zoie事前要足準備防走光,她坦言在場的工作人員多是男士,難免會尷尬,但為了理想效果,幾大都要做落去。試完裸背,是否代表Zoie之後可以去到好盡?「當然要有個尺度,今次算係我入行以嚟最性感,又唔好畀界線自己住,只要係合情合理嘅情況,都可以接受。」

Zoie入行16年,2013年才加入無綫。短短3年,已有近10套劇出街,早陣子播出的《EU超時任務》,Zoie飾演的水晶梨反應理想,看來前途一片光明。但回想起3年前,Zoie加入TVB的決定其實不容易,「身邊會有朋友同我講:『而家先入TVB?』我當時都好掙扎,會唔會真係太遲呢?而且我入行10幾年唔係短,但時間一耐咗,我就覺得其實無分遲定早,冇之前經歷就冇今日嘅我,兜兜轉轉,尋找緊自己鐘意嘅嘢,就係演戲。」

走出舒適圈

與此同時,Zoie認為有機會就要好好把握,加入了TVB,讓她走出了人生的Comfort Zone,「以前會單純覺得做緊一份工作,亦好安於現狀、好知足,但我都會想進步。」她亦清楚這一行競爭好大,「無錯,要有轉變係需要勇氣、都知道競爭好大,靚過你嘅人又有,好多同事都好識演戲,會覺得自己好渺小,但正因為咁要去增值自己,咁先可以幫到自己,自信心先會返嚟。」所以,現在Zoie每收到一個劇本,都會變得更加積極,「嚟到呢度見到好多好優秀嘅人,令我更加努力,係一件好事。」得到別人肯定,所有打撃說話不再重要,如今Zoie雖然仍未想過自己會否紅得起,但至少慶幸自己有踏前一步,享受自己演戲的時刻,「再過多幾年就結婚生仔,唔去做就無時間去做㗎啦。」

慢慢嚟唔好急

Zoie的事業漸入佳境,那麼感情又有無著落呢?她表示來到談婚論嫁的階段,選擇伴侶都要非常嚴謹,「要相處一大段時間係咪真係真命天子。」她認為身邊有好多可以相處的對象,但最重要視乎對方的本質,「要對我同屋企人要好,孝順都好重要,而且肯為自己的人生努力。」不過講講下,Zoie坦言已過了心急想達成結婚目標的年紀,雖然婚點都一定要結,仔點都一定要生,但Zoie表示要找一個適合的人,最佳方法就是時間,「咁先可以搵到一個適合自己嘅人。」希望Zoie可以搵到,咁就可以事業愛情兩得意!

Zoie拍裸背場面難免會有尷尬,但她相信這是發揮專業精神的最佳時機。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。