譚嘉儀於2024年10月尾在香港演藝學院舉行首個個人演唱會《Be With You 演唱會2024》，事隔一年多，演唱會卻爆出拖欠酬勞的醜聞，為該演唱會擔任和音的Kasey Pong早前在社交平台公開不滿，直言至今仍未收到應得酬勞。對此，譚嘉儀本人接受傳媒訪問時透露：「我知音樂班底收唔到錢，我都未收到6位數演出費，完全冇收過，我都係苦主。」被指是主辦方負責人Jelly今日亦有發聲明解釋，否認自己是主辦並直指譚嘉儀指自己是苦主是無稽之談。

負責人 Jelly 聲明反擊：譚嘉儀自導自演「老細」變「打工」？

全文如下：

Hello 大家好我係Jelly！

就近日各傳媒報道有關於《譚嘉儀Be with You 演唱會2024》提及到我失蹤、公司執笠同走數等等嘅事宜，因為已經影響到我身邊嘅人包括姚子羚小姐及DJ樂宜，所以我有必要同大家講返事情嘅真相。

當時因為譚小姐仲係TVB合約，而佢自己好想搞一個完全屬於佢並可以自己主導晒嘅演唱會，所以就需要其他人去幫佢做呢件事，作為朋友嘅我當時就答應幫佢執行，並且係由譚小姐本人注入資金去做。成件事由海報設計/舞台設計/歌曲/服裝/Dancer/Rundown/嘉賓/慶功等等全部都係由佢去話事。但最後佢竟然表示自己只係打工？！還無稽到同傳媒講自己也是「苦主」？

至今已經接近一年嘅時間譚小姐同我的確無聯絡，我唔理解點解譚小姐會話搵我唔到？只係佢冇搵我，不是搵唔到。因為今次本人嘅愚蠢我亦付出左代價，借貸去找一啲款項，其實調返轉我應該要向佢追討返呢啲嘅款項。

最後，我想講，我並不是主辦，我都要追番譚小姐錢。

我肯定呢個演唱會就算賺錢亦都與我無關，因為會係歸晒譚小姐所有！

譚嘉儀曾指：對方揀人出糧、已讀不回

譚嘉儀本人曾稱是事件中的受害者，她接受傳媒訪問時透露演唱會合約於她仍屬TVB旗下藝人期間簽署，追討事宜由TVB全權負責，但至今未有結果。她亦提到曾親自聯絡主辦方負責人Jelly，對方初時以「過年就會有」推託，後來更完全已讀不回。譚嘉儀續說︰「起初話過年就會有，我一直都唔係追自己嗰份先，係幫音樂班底追，但佢一路拖。之後打畀佢唔聽，留言不回。聽聞有啲收到（酬勞）。以我所知佢係揀人出糧，會畀番佢會繼續合作嘅人。」並指會繼續追討番自己應得的報酬。