陳百祥霸氣回應九龍塘住宅僭建問題：唔關你哋事！
撰文：吳子生
出版：更新：
對於九龍塘住宅有僭建物，阿叻霸氣回應：「我唔使同任何人交代」。（陳順禎攝）
陳百祥（阿叻）今日（20/7）現身佐敦出席新店開張儀式。提到其九龍塘單位被指涉及多項僭建，自08年起屋宇署已向他發出多個清拆令，惟多年來未見拆除。阿叻就此接受《香港01》訪問時表示：「我自己內部裝修使乜同人交代。不過今日見到你咪同你講，我而家進行緊內部裝修，多謝佢哋再一次畀我可以整到靚一靚。其實我啲內部裝修係唔會影響普通人嘅，可能啲人就叫我選特首，咁我見到選特首啲人都有潛建，咁我咪同佢哋一樣囉。」
阿叻今日出席新店開幕。（陳順禎攝）
被問到會清拆玻璃屋？阿叻續說：「嗰啲唔係玻璃屋，大家要知道個樣嘢係乜，而家我唔同大家討論法律問題。其實嗰啲嘢就好似窗簾咁嘅樣啫，隨時拆得落嚟。（咁即係話嗰啲唔屬於僭建部分？）咁又唔好咁講，我唔係話僭建同唔係僭建，而係好灰色地帶，即係你喺屋企擺咩傢俬都係由你決定，但總有啲人就覺得你嘅傢俬好礙眼。（08年起屋宇署已出信通知你要清拆僭建物！）咁我咪由08年起不停咁裝修囉。只係唔同時段有唔同嘅裝修，屋宇署係跟到足㗎。咁就唔關你哋事啦，而係關我同屋宇處嘅事啦，間屋只係我住，我唔需要同人交代。」