【乘勝狙擊】美女魔術師特訓陳展鵬　扮型靠苦練：佢練到手抽筋

無綫劇《乘勝狙擊》，由陳展鵬、陳山聰等人擔正，內容不乏千局及魔術，而每次展鵬落場賭錢，例必chok到爆玩轉戒指及籌碼，一個字「型」。至於劇中飾演魔術師的陳山聰，不但要用魔術去進行千局，甚至用魔術追求賭王女兒傅嘉莉，而各種大小魔術的幕後指導，原來竟然是一位美女魔術師Queenie Poon(潘凱盈)，亦有人稱她為「魔法小Q」，讓人相當意外。

在傳統的魔術舞台，女性多是擔當助手角色，如刀鋸美人的美人，或者穿得很少布，用來分散觀眾的注意力，不過在Queenie眼中卻有點過時，她表示：「呢啲都係過往大家嘅認知，覺得男魔術師係力量型，其實女性嘅魔術師亦係好有創意，我希望魔術唔止用係舞台表演上，可以放入唔同嘅範疇。」Queenie說的正是將魔術融入電視劇及電影之中，熱播的《乘勝狙擊》正是最佳例子，現時Queenie在新春、聖誕節等旺季，一個月可以賺得六位數，她卻笑言只是貼地的小市民，「係試過一個月搵十幾廿萬，但我都會用喺添置魔術器材方面，唔會亂使錢。」

劇中陳山聰在首集已經要踏上舞台表演魔術，而Queenie就要擔任設計及指導工作，她表示：「劇裡面山聰嘅魔術元素最多，所以我要教佢舞台、火及牌技，佢跟咗我上十堂以上，每次都兩、三個鐘，跟住要返屋企自己苦練。」不過Queenie更欣賞展鵬，大讚他的功架似一個有兩、三年經驗的魔術師，「展鵬佢有個招牌動作，包括將戒指在手中轉來轉去，同埋將個大銀一變四，佢練親都幾個鐘，真係練到手抽筋㗎。」

問到Queenie誰人的魔術天分最高，誰人學魔術時雞手鴨腳，她即笑說：「我覺得潘翁(潘志文)幾好喎，佢玩牌出嚟嘅效果好好。(傅嘉莉又是否最論盡呢？)咁又唔係喎，劇裡面佢係富家女，要喺爸爸(單立文)面前展示洗牌技巧，咁佢劇裡面係唔識㗎嘛，可以照拍佢唔識洗牌，但Kelly就好努力跟我練習，之後仲可以變4條A出嚟。」

Queenie在理工大學修讀Marketing，卻投身跟本科風馬牛不相及的魔術師工作，她說全因為「劉生」的啟蒙。著名魔術師劉謙？她笑說：「不是，是劉德華，記得中學時看過他的《再說一次我愛你》，片中他玩過一個叫「明日環」嘅魔術，被呢個畫面深深吸引，周圍去搵點樣做到，開始接觸魔術，之後就買啲外國魔術教材，又認識咗其他魔術師大家研究交流。」Queenie入行後在不同舞台表演，更成為了兒童節目《放學ICU》其中一個魔術環節的嘉賓主持，而《乘勝狙擊》則是她首個一手包辦魔術指導的劇集。Queenie外形不俗，又玩得一手出神入化的魔術，索性拍埋劇可能更有發展。