「港普F4」之最!陳法蓉被爆桃花旺 蔡少芬是公認「大富婆」

撰文:朱奕錦
出版:更新:

四位「凍齡女神」蔡少芬(Ada)、朱茵、陳法蓉(Monica)及洪欣是圈中出名的閨蜜團,最近四人首度合體登上內地真人騷《請吃飯的姐姐》,在節目中不時互爆往事,盡顯姊妹情深。日前四人再次接受考驗,大玩「港普F4」之最,選出最多人追、最易嬲、最不守時、最飲得、最易呃及最囉嗦、最有錢等人選,結果「桃花王」竟然由陳法蓉所得,而朱茵及蔡少芬分別被封為「遲到王」及「不醉王」,至於洪欣成為「易嬲王」,認真「各有千秋」。

四人感情深厚。

朱茵表示:「佢(陳法蓉)不停享受被追求嘅感覺,如果唔係,佢已經結婚。」而陳法蓉亦笑言自己實至名歸:「我有好多人追,但我唔鍾意嘅話我會拒絕,唔會畀對方希望,浪費對方金錢及時間,呢個秘密唔係太多人知,因為好多時啲人見唔到我身邊有太多男性出現,但其實我拍拖非常機警,拍咗你哋都唔會知。」

陳法蓉是公認的「桃花王」。

其實陳法蓉被選為「桃花王」之餘,還當選「囉嗦王」,Ada指:「例如我哋今日要嚟呢個地址咁,佢(陳法蓉)google個地址畀我哋,仲要括住呢個地址,我哋話明架喇,佢仲要問係咪真係明架,仲要好詳細咁再講一次,你話佢囉唔囉嗦呀!」不過陳法蓉解釋自己不是囉嗦,只是詳細:「係非常詳細,佢哋有咩想問,無論係問路、問咩電器好用、有咩大減價,佢哋都好鍾意問我,而我亦會上網尋求各方答案及分析。」

陳法蓉非常細心。

講到「遲到王」及「不醉王」,原來最不守時的是朱茵,Ada透露:「例如我哋約佢(朱茵)半個鐘後見,佢通常三個鐘後先出現,甚至乎唔出現,但佢而家有咗個女之後約佢,佢已經準時好多,但都係會遲。」而朱茵對此直認不諱,她還笑說:「因為我係大人物!」至於被票選為「不醉王」的Ada,直指其他三位好姊妹是「老人家」,只顧養生,不喜歡飲酒:「佢哋出嚟好悶架,一人一支熱滾水或蔘茶,佢哋三個係老人家嚟,但我唔係,我係時代感、年青一輩,我會飲紅酒或者啤酒。」

Ada獲封「不醉王」。

此外,Ada還當選四人之中的「大富婆」,朱茵指:「Ada最忙,每次約佢,佢都在工作,最愛錢就係佢。」而陳法蓉指Ada除賺錢多之外,還很節儉,所以認為她們四人之中最有錢的一位,Ada本人也很認同:「我會集中把所有錢放在投資、可以再生錢,例如買樓,朱茵喜歡放在自己臉上,法蓉喜歡買東西、買衫,洪欣就一半一半。」

Ada自認是「大富婆」。

而洪欣分別當選「易嬲王」、「易呃王」及「口疏王」,Ada說:「佢守唔到秘密,尤其是佢嬲起上嚟發顛嘅時候,乜都爆晒出嚟。」而洪欣亦自認性格屬於率直及火爆型,不過問到她為何成為「易呃王」時,她則說:「佢哋成日講笑嘅嘢,我都會當真。」

洪欣性格率直。
發表評論...