青春不要臉｜伍樂怡「九龍塘食糖水」勾起黃日華情史：兜巴星佢

伍樂怡（Kelly）今日（25/1）現身電視城出席無綫劇集《青春不要臉》宣傳活動。提到有幕劇情講到自己誤信安東尼為好人，跟他去「九龍塘食糖水」，但當抵達後才發現對方另有所圖想開房。事後有網民猜測劇情玩踢爆，指黃日華當年曾追求翁美玲。Kelly笑言：「其實我都係睇返啲新聞先知呢件事，令到我都產生好奇，於是頭先我就走去問德哥（監製潘嘉德）。點解我又忽然又多咗個翁美玲，而且又同黃日華有關？而佢哋就話畀我聽，係反映嗰個年代嘅劇情，就唔係反映緊邊一個人。」

Kelly續說：「其實我都真係好奇嘅，而套戲播出街之後，撩翻起咁多陳年舊事出嚟，我都覺得好出奇。因為我唔係喺嗰個年代，所以我就當一個故仔去聽。（有冇上網搵過相關新聞？）咁又冇。因為我噚日先睇到報道，心諗今日返嚟問監製咪仲快。（有否遇過男仔暗示去開房？）哈哈，我諗我冇。真係冇遇過，可能我真係遲鈍，又或者你畀啲提示我，我都未必聽得明嘅人嚟。就好似去『九龍塘食糖水』我喺做圍讀嘅時候，最後一個人先明白。（直接表達你先明？）哈哈，如果佢直接表達，我諗我會兜巴星佢。」