簡慕華離開無綫 做足17年無留戀：自己喺TVB冇突破！
撰文：林通賢
出版：更新：
簡慕華在無綫17年，每次演出都令網友激讚。（網上圖片）
識做戲唔等於一定攞獎，尤其在電視台，幾多好戲之人，一個獎都冇，簡慕華就係其中一個例子。2000年港姐出身，入行17年，剛完成劇集《超時空男臣》正式離巢，她接受《香港01》電話訪問時說「係呀，我離開TVB，主要原因係我覺得自己停咗喺到好耐，去學吓嘢又好，或者input下自己，我其實係想揀嘢做，我離開係因為TVB冇得選擇，冇得選擇自己喜歡可以或者自己鍾意嘅角色，但如果我出咗去，所有嘢我都可以自己選擇囉。」
簡慕華為監製戚其義御用班底，她在《心戰》的演出當時亦令觀眾難忘。（網上圖片）
簡慕華不同其他失意離巢藝員，她在劇集角色戲份越來越重，在《超時空男臣》、《翻生武林》兩套未出街的劇中，角色戲分亦令她滿意，但她最想要的是挑戰，她說：「我鍾意有挑戰性，我好少睇網上留言，但我覺得自己喺TVB冇突破喇，我好唔想有日觀眾會話 『又係簡慕華』、『簡慕華咪又係咁』、『做極咪又係簡慕華』之類，（有邊個角色妳最鍾意？）咁耐以來，所有角色我都覺得如果畀我再做多次可能會好D，（頒獎禮永遠都冇份，有咩感覺？）無辦法，人哋好過我，下次努力過…...唉！都做咗咁多年人啦，如果我唔係咁諗，我點繼續做人？（即係失意？）仲未，我仲有團火，你一失意就世界末日㗎，唔可以negative，前面永遠是最好的，我會咁諗，一日仲係呢行，一日都有機會，除非觀眾已經唔想再睇我。我緊張觀眾唔鍾意我，多過驚冇獎攞。」
簡慕華和同屬戚其義班底的黃德斌特別合拍，上年《鐵馬戰車》二人飾演夫婦。（網上圖片）
簡慕華在未播映的《翻生武林》戲份不少，但她亦想離開大台，希望有得選擇。（網上圖片）
《金枝慾孽貳》簡慕華飾演汀蘭。（網上圖片）
簡慕華在《4 in love》飾演大律師，同金剛發生一夜情後拍拖。（網上圖片）