【全職沒女】女神陳瀅拍拖好慢熱 色誘張振朗:成件事錯晒   

撰文:
最後更新日期:

不少男士都被陳瀅一舉手一投足而迷倒。(符祥定攝)

最近TVB《全職沒女》出街,為一眾宅男提供了狗衝返屋企坐定定睇住電視食飯的理由,之唔係有陳瀅囉!她在戲中連番色誘張振朗,不單止用盡發電廠的能源放電,更有多個濕身、生擒對方的挑逗畫面,相信一眾男士除了看得㷫烚烚,還會咬牙切齒,腦內瘋狂OS:「點解我唔係張振朗?」、「如果我係張振朗,我就!」好了,不要再FF。總而言之,陳瀅在女神行列又佔了一席地位,欲向神檯位進發,難怪Google最近都有她的名字出現,看大家對她有多念念不忘啊!

+5
+4
+3

陳瀅,正呀喂~(符祥定攝)

雖然大家看陳瀅主動出撃,相當振奮人心,但原來陳瀅與張振朗最初互不過電,做過多個親密場口之後,發覺彼此都有強烈的距離感:「我同佢(張振朗)都係好慢熱嘅人,啱啱開始大家都唔係好願講嘢,又或者傾偈都係得兩句,問下對方咩星座咁,好快就冇咗話題。但係見面第二次就要拍親密戲,要錫咁。拍完就發現大家係完全冇feel,好冇火花,成件事係錯晒。」事後兩人就惡補關係,約出街食飯傾傾偈,最起碼了解對方的想法,到最後再拍親熱戲,做到彼此有愛的感覺,陳瀅都好開心:「因為最初大家唔想同對方溝通,到後來做到劇本講到深愛對方嘅效果,真係好滿足。」

劇中陳瀅對張振朗主動出撃,現實中,女神坦言自己極度被動又慢熱,唯一一次追男仔就在中學時,還要是初戀。陳瀅憶述這段追仔過程,還是有點嬌羞:「之前喺加拿大,正值喺冬天,咁我就借啲意同佢講:『好凍吖!』,之後佢就畀隻手我取暖,咁就一齊咗。」陳瀅表示人越大就越變得被動,以前拍拖都會做些輕狂事:「當時同男朋友出街,都冇咩好做。眼前見到一個樓高兩層但未封頂嘅獨立屋地盤,就同我男朋友打賭。我就好大膽咁走上去,因為未封頂,上到去個空間又好細,樓下又有好多木條咁。如果一唔小心跌落去,就會被啲木條插親。」好彩咩事都冇,如果唔係,世上又少咗個女神。

+5
+4
+3

《全職沒女》出街,陳瀅又再度成為熱話,觀眾大讚陳瀅好正。不過當事人就覺得自己似沒女多啲:「喺我眼中,沒女唔係指冇樣、冇錢同冇學歷。我諗沒女係少一份上進心,同埋會好懶。我自己就好懶,喺儀容上,我試過成個星期都冇洗過頭。有一次返去加拿大搵屋企人,兩個星期入面又剩係洗兩三次頭。因為我頭髮好多,吹頭都要用成個鐘,加上髮質又乾,所以會偷雞唔洗頭。如果你見到我冇紮頭髮,就有洗頭;如果冇,咁你就明啦......」好在,做訪問當日,陳瀅係有洗頭嘅。

講到女神,陳瀅當然唔會認,佢對自己要求甚高。「好多人講起女神,大家都係從個外表出發,但有好多嘢都唔能夠由外表觀察得到。最緊要就係有內涵,當你講嘢嘅行為舉止,畀人覺得你有內在,咁先稱得上係女神。」咦,陳瀅除了有精緻的面孔,又有學歷兼浸過咸水,女神呢個稱呼,應該冇人異議啦?

+6
+5
+4


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。