無綫免費播足總盃決賽 阿記死忠袁文傑：起碼唔使上網搵link！
撰文：郭敏玲
出版：更新：
袁文傑OS：YEAH！返工有得睇波！
各位裝咗樂視的球迷，LeSports HK平台直播的英格蘭足總盃(FA Cup)決賽(阿仙奴對車路士)因為節目調整關係，就冇得睇現場直播，本來就覺得好失落，心諗有冇搞錯！阿記對車仔喎！不過，經過今日之後，呢種諗法唔該要拋諸腦後，因為TVB今日就宣布取得《英格蘭足總盃決賽》—阿仙奴對車路士之香港區獨家播映權，安排在周六（5月27日）晚深夜12時05分於翡翠台直播，即係話唔洗上網，直接打開電視，再一次同全世界100％同步，兼免費有得睇波，真係要跳起大叫Yeah啦！除此之外，仲有另一場賽事《德國盃2016/2017決賽》—法蘭克福對多蒙特，緊接在後，於深夜2時30分轉播；至於myTV SUPER免費區就在深夜1時50分直播。
延伸閱讀：無綫免費播足總盃決賽 阿記死忠袁文傑：起碼唔使上網搵link！
TVB直播阿仙奴對車路士，袁文傑即刻勁雀躍。
《香港01》之前就有問過阿仙奴忠實球迷袁文傑，本來冇得睇樂視直播呢場世紀大戰，佢都疊埋心水睇重播算，起碼好過冇得睇，但係而家佢嘅老闆TVB有得睇喇喎，帶來新機，佢就好驚訝：「下？居然有咁好嘅消息？」仲要反覆再問：「係咪堅㗎？」、「係我就Share去啲足球群組到喇！」作為阿記死忠，袁文傑表示一定撐愛隊：「好老實！一次半次，又係有阿仙奴份，梗係撐喇！我當返公司睇波咋嘛！起碼唔使喺網上面搵link睇呀！」絕對係正確途徑睇波㖭啦！阿記同車仔球迷睇嚟要多謝TVB。除此之外，袁文傑眼見公司直播賽事，自己都好恨有份參與講波：「如果我搵我講波就好喇，不過佢哋有自己團隊，或者做嘉賓都好啦。」至於網民知道TVB直播足總盃之後，都好想游生講波，留言表示：「我要游生講波！」、「游生最好出埋力，講埋波！」話唔定TVB留意到，真係叫游生講波！