羅天池離開無綫做《詭探》武指 愛回家阿登苦練MMA:想做甄子丹

撰文:
最後更新日期:

還記得大台《愛.回家》的阿登羅天池嗎?羅天池憑這個角色獲得不少掌聲和最令人印象深刻,可是有才華的始終留不住,阿登兩年前為了前途毅然離開無綫,闖出自己新天地。現在的羅天池已成為了專業的動作指導,新作就是近年好hit的《詭探》。

羅天池負責其中兩場戲,其中一場喪屍戲是大場面,正在深圳拍攝內地劇《超感》的羅天池接受《香港01》電話訪問時說:「場戲講3批人分頭入屋對付喪屍,我度咗好特別嘅場口,所以過幾日我都要返去剪片,自己剪番可以掌握番個節奏。」另一場戲是講鬼上身,邵仲衡會施法驅鬼,呢場動作場面也是羅天池設計。其實他已擔任過至少6部電視劇及網絡電影的動作指導,《詭探》的製作團隊早已欣賞他的作品,他說:「之前合作過網絡電影《虎爸龍媽》,覺得我幾好所以今次再搵我。」

羅天池今年2月參加「崑崙之路」泰拳比賽奪冠,是名副其實的高手。

TVB出身的他為《詭探》做武指反攻無綫,羅天池直言:「開心呀!希望呢套劇會令TVB進步啦!以往無綫啲製作太保守,係《不懂撒嬌的女人》至好似拍得open啲!希望有良性競爭,成個行業都好!」羅天池做開演員再轉做動作指導,他又表示最想做的其實是做回演員,就像他的偶像甄子丹,「我梗係想做甄子丹啦!但要睇緣份啦,我好想拍一套懸疑警匪動作片。」

羅天池早在TVB時期已展露過他泰拳拳術的厲害,現實中他不單只棈通泰拳,也鑽研MMA(綜合格鬥)和巴西柔術。他自小便喜愛武術,學過舞獅、博擊、空手道、柔道、飛刀及格鬥技等等,是名符其實的武林高手。他解釋:「我鍾意實戰、實用嘅武術,好大癮!我唔擔心受傷,只係擔心冇工作。」所以他早前已停止玩容易受傷的泰拳,而學習刀術和菲律賓魔仗:「學呢兩樣嘢都係因為工作,耍起上嚟畫面幾好睇。我會打到六十幾歲㗎!不過冇諗過教人,只會喺劇組教下演員咁囉!」

+10
+9
+8


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。