愛回家｜鄭世豪被屈遲到發文反擊 周嘉洛：做人總會有呢個階段
撰文：吳子生
出版：更新：
周嘉洛今日（7/11）現身將軍澳出席《善心滿載仁愛堂》記者會。提到《愛回家》同劇演員「細龍生」鄭世豪日前突然在社交平台上載拍劇開工嬲爆照，並發文表達不滿，指自己等足7個小時，仍被屈遲到：「「呢份工真係愈好人 愈難撈 係時候收自己皮」。
周嘉洛慶幸自己未被老屈過。（陳順禎攝）
周嘉洛就事件接受《香港01》訪問時表示：「其實我咩都唔知道，因為都唔知來龍去脈。（推得一乾二淨！）咁又唔係推嘅，確實真係唔關我事，唔通我攬上身咩。（有冇安慰鄭世豪？）咁又冇。（佢心情好灰，呻做好人愈難撈！）我覺得做人難撈都係嘅，因為我覺得做人總會有呢個階段。（有冇試過被老屈感委屈？）又冇試過，但我好慶幸同我開工都係嗰班，全部都好好，咁所以我冇遭遇呢種咁慘嘅事。」
睇嚟「細龍生」鄭世豪真係好嬲。
周嘉洛今日現身將軍澳出席《善心滿載仁愛堂》記者會。（陳順禎攝）